Shahid Afridi: शाहिद आफ्रिदीला कोरोना व्हायरसची लागण

शाहिद आफ्रिदी पाकिस्तानच्या मोठ्य़ा क्रिकेटपटूंपैकी एक आहे. पाकिस्तानसह अन्य देशातही शाहिदचा चाहतावर्ग आहे.

लाहोर: पाकिस्तान सुपर लीगमधील (Pakistan Super League) सलामीच्या सामन्याच्या काहीतास आधीच पाकिस्तानचा माजी क्रिकेटपटू शाहिद आफ्रिदीला (Shahid Afridi) कोरोना व्हायरसची लागण झाली आहे. आजपासून कराचीमध्ये या लीगला सुरुवात होत आहे. आफ्रिदी क्वेट्टा ग्लॅडिएटर्सचे (Quetta Gladiators) प्रतिनिधीत्व करणार आहे. पीएसएलमधील ही त्याची चौथी फ्रेंचायजी आहे. पाकिस्तान क्रिकेट बोर्डाच्या नियमानुसार, 41 वर्षीय शाहीद आफ्रिदी घरातच क्वारंटाईन होणार आहे. क्वारंटाइन कालावधी पूर्ण केल्यानंतर तसेच आरटी-पीसीआर टेस्ट निगेटिव्ह आल्यानंतर त्याला क्वेट्टा ग्लॅडिएटर्स संघासोबत राहता येईल.

465 धावा केल्या
मुल्तान सुल्ताने संघाने आफ्रिदिला क्वेट्टा ग्लॅडिएटर्स संघाला दिले आहे. अष्टपैलू आफ्रिदीने PSL मध्ये 50 सामने खेळले आहेत. त्याने तीन फ्रेंचायजींकडून खेळताना 465 धावा केल्या आहेत. मुल्तान सुल्तान, पेशावर झालमी आणि कराची किंग्ज संघाकडून आफ्रिदी खेळला आहे. चेंडूने सुद्धा त्याने चांगलं योगदान दिलं आहे. प्रतिषटक सात पेक्षा कमी धावा देत त्याने 44 विकेट घेतल्या आहेत. PSL 2022 ला सुरुवात होण्याआधीच आफ्रिदीने ही त्याची शेवटची स्पर्धा असेल असे जाहीर केले होते.

“क्वेट्टा ग्लॅडिएटर्सकडून खेळण्यासाठी मी उत्सुक आहे. 2019 ला जेतेपद पटकावल्यानंतरही PSL मध्ये आफ्रिदीने अनेक चढ-उतार अनुभवले. ही माझी शेवटची PSL स्पर्धा असून मला विजेतेपदाच्या ट्रॉफीसह स्पर्धेचा शेवट करायचा आहे” असे आफ्रिदीने सांगितले. 27 जानेवारी ते 27 फेब्रुवारी दरम्यान PSL 2022 स्पर्धा होणार आहे. कराची आणि लाहोर या दोन शहरात ही स्पर्धा होणार आहे. कराची किंग्ज आणि मुल्तान सुल्तानमध्ये गुरुवारी सलामीचा सामना होणार आहे.

PSL 7 Former Pakistan all-rounder Shahid Afridi tests Covid-19 positive