GT vs PBKS IPL 2022: तेवतियाची मैदानातच सटकली, सुदर्शनवर चिडला, VIDEO, पंजाब किंग्सला 144 रन्सचं टार्गेट

Rahul Tewtia

Image Credit source: twitter

मुंबई: पॉइंटस टेबलमध्ये अव्वल स्थानावर असलेल्या गुजरात टायटन्स आणि पंजाब किंग्समध्ये (GT vs PBKS) सामना सुरु आहे. नवी मुंबईच्या डी.वाय.पाटील स्टेडियमवर ही मॅच होत आहे. हार्दिक पंड्याने टॉस जिंकून पहिली फलंदाजी करण्याचा निर्णय घेतला. पण गुजरात टायटन्सच्या फलंदाजांना आज अपेक्षित कामगिरी करता आली नाही. गुजरातचा संघ आज नेहमीच्या फॉर्ममध्ये दिसला नाही. शुभमन गिल (Shubhaman Gill) आणि वृद्धीमान सहा हे दोन्ही सलामीवीर पावरप्लेच्या आतच बाद झाले. हार्दिक पंड्याही (Hardik pandya) आज काही विशेष करु शकला नाही. सात चेंडूत अवघी एक धाव करुन तो तंबूत परतला. साई सुदर्शन आणि डेविड मिलरने आज गुजरातला संकटातून बाहेर काढण्याचा प्रयत्न केला. पण मिलर लिव्हिंगस्टोनच्या चेंडूवर बाद झाला. त्याने फक्त 11 रन्स केल्या. आज पुन्हा एकदा राहुत तेवतियावर संघाला संकटातून बाहेर काढण्याची जबाबदारी होती.

सुदर्शनकडून प्रतिसाद मिळाला नाही

तेवतिया सोबत सुदर्शन खेळपट्टीवर होता. तो दुसऱ्याबाजूने डावाला आकार देत होता. तेवतिया तसा शांत असतो. पण धावगती वाढवण्याचा दबाव त्याच्यावर दिसला. राहुल तेवतिया आज रनआऊट होण्यापासून थोडक्यात बचावला. त्यावेळी तो सहकारी सुदर्शनवर चिडला. गुजरातच्या डावात 12 व्या षटकात ही घटना घडली. तेवतियाने एकेरी धाव पळण्याचा प्रयत्न केला. तो खेळपट्टीच्या मध्यापर्यंत आला होता. पण त्याला दुसऱ्याटोकाकडून सुदर्शनकडून प्रतिसाद मिळाला नाही. तेवतियाची विकेटच गेली असती, पण थोडक्यात तो वाचला. राहुलला हे पटलं नाही, तो सुदर्शनवर मैदानातच चिडला.

पंजाब किंग्सला 144 धावांचे टार्गेट

दरम्यान गुजरात टायटन्सने निर्धारीत 20 षटकात आठ बाद 143 धावा केल्या आहेत. शुभमन गिल (9) वृद्धीमान सहा (21) आणि हार्दिक पंड्या (1) लवकर बाद झाले. नेहमी संकटमोचक ठरणारे राहुल तेवतिया (11) आणि डेविड मिलरही (11) लवकर बाद झाले. राशिद खानला भोपळाही फोडता आला नाही. गुजरात टायटन्सकडून आज साई सुदर्शनने एकबाजू लावून धरली. त्याने 50 चेंडूत नाबाद 64 धावा केल्या. यात पाच चौकार आणि एक षटकार होता.