Dinesh Karthik याची निवृत्तीनंतर Rcb बॅटिंग कोच-मेंटॉर म्हणून नियुक्ती
Dinesh Karthik Batting Coach and Mentor Rcb: आयसीसी टी 20 वर्ल्ड कप संपताच आरसीबीने दिनेश कार्तिकची बॅटिंग कोच आणि मेंटॉर म्हणून निवड केली आहे.
टीम इंडियाने रोहित शर्माच्या नेतृत्वात अंतिम सामन्यात दक्षिण आफ्रिकेला पराभूत केलं. टीम इंडियाने यासह 17 वर्षांनंतर टी 20 वर्ल्ड कप ट्रॉफी जिंकली. टीम इंडियाने या विजयासह 2007 नंतर टी 20 वर्ल्ड कप विजयाची प्रतिक्षा संपवली. टीम इंडियाच्या या विजयामुळे साऱ्या भारतात आनंदाची लाट पसरली आहे. वर्ल्ड कप जिंकून आता काही तास उलटले आहेत. मात्र त्यानंतरही वर्ल्ड कप विजयाचा आनंद ओसरलेला नाही. टीम इंडियाच्या विजयानंतर कॅप्टन रोहित शर्मा, विराट कोहली आणि रवींद्र जडेजा या तिघांनी टी20iमधून निवृत्ती जाहीर केली. तिघांनी निवृत्तीसाठी अशी वेळ निवडल्याने चाहत्यांना समाधान आहे. साऱ्या देशात वर्ल्ड कप विजयाचा माहोल असताना आता एक मोठी बातमी समोर आली आहे.
काही दिवसांपूर्वी क्रिकेटच्या सर्व प्रकारातून निवृत्ती जाहीर करणाऱ्या टीम इंडियाच्या दिग्गज खेळाडूला मोठी जबाबदारी मिळाली आहे. दिग्गज दिनेश कार्तिक याची आयपीएलमधील आरसीबी या टीमच्या बॅटिंग कोच आणि मेंटॉरपदी नियुक्ती करण्यात आली आहे. आरसीबीने सोशल मीडियावर दिनेश कार्तिकची बॅटिंग कोच आणि मेंटॉर म्हणून नियुक्ती करण्यात आल्याची माहिती दिली आहे. त्यामुळे आता विकेटकीपर बॅट्समन आरसीबीच्या खेळाडूला मार्गदर्शन करताना दिसणार आहे.
दिनेश कार्तिकची आंतरराष्ट्रीय कारकीर्द
दिनेश कार्तिकने 26 कसोटी सामन्यांमध्ये 1 हजार 25 धावा केल्या आहेत. तसेच 94 एकदिवसीय सामन्यात 1 हजार 752 धावा ठोकल्या आहेत. तसेच कार्तिकने 60 टी20i मॅचमध्ये 142.61 च्या स्ट्राईक रेटने 686 धावा केल्या आहेत. दिनेश कार्तिकने तिन्ही फॉर्मेटमध्ये भारताचं प्रतिनिधित्व केलं. मात्र कार्तिकला कसोटी व्यतिरिक्त इतर 2 फॉर्मेटमध्ये शतक ठोकता आलं नाही.
कार्तिकची आयपीएल कारकीर्द
दिनेश कार्तिकने आयपीएलच्या 17 व्या मोसमातील आरसीबीच्या एलिमिनेटरमधील पराभवानंतर निवृत्ती जाहीर केली. दिनेश कार्तिकने आयपीएलमध्ये एकूण 6 संघांकडून एकूण 257 सामने खेळले. कार्तिकने या 257 सामन्यांमधील 234 डावांमध्ये 22 अर्धशतकांसह 4 हजार 842 धावा केल्या.
कार्तिक आरसीबीचा कोच आणि मार्गदर्शक
Welcome our keeper in every sense, 𝗗𝗶𝗻𝗲𝘀𝗵 𝗞𝗮𝗿𝘁𝗵𝗶𝗸, back into RCB in an all new avatar. DK will be the 𝗕𝗮𝘁𝘁𝗶𝗻𝗴 𝗖𝗼𝗮𝗰𝗵 𝗮𝗻𝗱 𝗠𝗲𝗻𝘁𝗼𝗿 of RCB Men’s team! 🤩🫡
You can take the man out of cricket but not cricket out of the man! 🙌 Shower him with all the… pic.twitter.com/Cw5IcjhI0v
— Royal Challengers Bengaluru (@RCBTweets) July 1, 2024
वर्ल्ड कपमध्ये समालोचक
दरम्यान नुकत्याच पार पडलेल्या आयसीसी टी 20 वर्ल्ड कप 2024 स्पर्धेत दिनेश कार्तिक समालोचकाच्या भूमिकेत दिसला. कार्तिकने अनेक सामन्यांमध्ये समालोचन केलं. आता वर्ल्ड कप संपताच कार्तिकला आरसीबीकडून ही गोड बातमी मिळाली. त्यामुळे आता कार्तिकसमोर आयपीएलच्या पुढील हंगामात आरसीबीला 17 वर्षांनंतर चॅम्पियन करण्याचं आव्हान असणार आहे.