शकीब आणि बांगलादेश संघ नजरेतून उतरला, अँजेलो मॅथ्यूज का संतापला?
Sri lanka vs Bangladesh : श्रीलंकेचा खेळाडू अँजेलो मॅथ्युज बांगलादेश संघावर चांगलाच संतापला. बांगलादेश संघाची कृती लज्जास्पद असल्याचे त्याने म्हटले आहे. शाकीब आणि बांगलादेश संघ आपल्या नजरेतून उतरल्याचे त्याने म्हटले आहे.
Ban vs SL : वर्ल्डकप 2023 दरम्यान श्रीलंकेचा अष्टपैलू खेळाडू अँजेलो मॅथ्यूजने शाकीब अल हसन आणि बांगलादेश क्रिकेट टीमवर संताप व्यक्त केला आहे. ‘टाईम आऊट’ देण्याची अपील अत्यंत लज्जास्पद असल्याचे त्याने म्हटले आहे. बांगलादेशचा कर्णधार शाकीब अल हसनने मात्र हे नियमानुसार असल्याचं सांगत याबाबत कोणताही पश्चाताप नाही असे म्हटले आहे. आंतरराष्ट्रीय क्रिकेटमध्ये ‘टाइम आऊट’ झालेला मॅथ्यूज पहिला फलंदाज ठरला. मॅथ्यूजने क्रीजवर येऊन हेल्मेट घालण्यास सुरुवात करताच त्याचा पट्टा तुटला. त्याने ड्रेसिंग रूममधून दुसरे हेल्मेट आणण्याचा इशारा केला पण त्याला दोन मिनिटांपेक्षा जास्त वेळ लागला.
मॅथ्यूजविरुद्ध टाईम आऊटची अपील
शाकिबने मॅथ्यूजविरुद्ध टाईम आऊटची अपील केली. यानंतर अंपायरने त्याला बाद घोषित केले. मॅथ्यूज म्हणाला की, शाकिब आणि बांगलादेशची ही कृती अत्यंत लज्जास्पद आहे आणि इतर कोणत्याही संघाने असे केले असेल असे त्याला वाटत नाही. मॅथ्यूज मॅचनंतर पत्रकार परिषदेत म्हणाला, ‘आजच्या आधी मी शाकिब आणि बांगलादेशचा खूप आदर करायचो पण आता तसं होणार नाही. मी वेळ वाया घालवत नव्हतो. मी क्रीजवर असल्याचे सर्वांना दिसत होते पण माझ्या हेल्मेटचा पट्टा तुटला होता.
बांगलादेशची कृती अत्यंत लज्जास्पद
तो म्हणाला, ‘शाकिब आणि बांगलादेशची कृती अत्यंत लज्जास्पद आहे. असे क्रिकेट खेळायचे असेल तर ते अत्यंत लाजिरवाणे आहे. इतर कोणत्याही संघाने हे केले असेल असे मला वाटत नाही. मी त्यांना अपील मागे घेण्यासही सांगितले पण त्यांनी नकार दिला.
अँजेलो मॅथ्यूजने असेही सांगितले की त्याच्या संघाकडे व्हिडिओ पुरावे आहेत की तो वेळेवर क्रीजवर पोहोचला होता आणि पंचांनी त्याला आऊट देण्यापूर्वी तंत्रज्ञानाची मदत घ्यायला हवी होती.
आमच्याकडे व्हिडिओ पुरावे
तो म्हणाला की, ‘मी वेळेवर क्रीजवर पोहोचल्याचे व्हिडिओ पुरावे आमच्याकडे आहेत. मी क्रीजवर पोहोचलो तेव्हा माझ्याकडे अजून पाच सेकंद बाकी होते. यानंतर माझ्या हेल्मेटमध्ये समस्या असल्यास मी काय करू शकतो? हा खेळाडूंच्या सुरक्षेचा प्रश्न आहे. हेल्मेट न घालता यष्टिरक्षक स्पिनरविरुद्ध विकेट ठेवू शकत नसेल तर मी गोलंदाजाचा सामना कसा करू शकतो. अंपायरने मला आऊट देण्यापूर्वी तंत्रज्ञानाचा अवलंब करायला हवा होता. तंत्रज्ञान उपलब्ध असेल तर त्याचा वापर करायला हवा.
सामन्यानंतर श्रीलंकेच्या खेळाडूंनी बांगलादेशच्या खेळाडूंशी हस्तांदोलन केले नाही, तेव्हा मॅथ्यूज म्हणाले की, जर कोणताही संघ त्यांचा आदर करत नसेल तर ते दुसऱ्याचा आदर कसा करणार?
