Battlegrounds Mobile India कडून 50 मिलियन डाउनलोड्सचा टप्पा पार, Krafton कडून गेमर्सना खास गिफ्ट
क्राफ्टनने (Krafton) सोमवारी जाहीर केले की, PUBG मोबाइल इंडियाच्या या नवीन अवताराने (बॅटलग्राउंड्स मोबाईल इंडिया) Google Play Store वर 50 मिलियन डाउनलोड्स मिळवले आहेत.
मुंबई : बॅटलग्राउंड्स मोबाईल इंडियाने (Battlegrounds Mobile India) आपल्या पदार्पण प्रवासात एक नवीन मैलाचा दगड गाठला आहे. क्राफ्टनने (Krafton) सोमवारी जाहीर केले की, PUBG मोबाइल इंडियाच्या या नवीन अवताराने (बॅटलग्राउंड्स मोबाईल इंडिया) Google Play Store वर 50 मिलियन डाउनलोड्स मिळवले आहेत. (Battlegrounds Mobile India hits 50 million downloads, Krafton giving exclusive rewards to gamers)
धन्यवाद म्हणून, क्राफ्टन बॅटलग्राऊंड्स मोबाईल इंडिया गेम खेळणाऱ्या प्रत्येक गेमरला गॅलेक्सी मेसेंजर सेट परमनंट आउटफिटसह पुरस्कृत करणार आहे. दरम्यान, अशी माहिती मिळाली आहे की, iOS खेळाडूंना क्राफ्टनकडून iPhone वर बॅटलग्राउंड्स मोबाईल इंडियाच्या रिलीजबाबतची चांगली बातमी मिळू शकते.
पालकांच्या परवानगीशिवाय गेम खेळता येणार नाही
क्राफ्टनने आपल्या प्रायव्हसी पॉलिसी डॉक्यूमेंटमध्ये सांगितलं आहे की, जे गेमर्स 18 वर्षांपेक्षा कमी वयाचे आहेत, त्यांना आपल्या पालकांचा कॉन्टॅक्ट नंबर द्यावा लागेल. म्हणजेच पालकांचा कॉन्टॅक्ट नंबर न देता ही मुलं पबजी गेम खेळू शकणार नाहीत. ते या गेममध्ये साईन अपच करु शकणार नाहीत. पालकांच्या परवानगीनंतरच ही मुलं पबजी गेम साईन अप करु शकतील.
परंतु येथे कंपनीची सर्वात मोठी चिंता ही आहे की, गेमर्स जो फोन नंबर देतील तो फोन नंबर बरोबर असेल का? कारण कोणताही युजर कोणाचाही फोन नंबर देऊन कंपनीची फसवणूक करु शकतात. अशा परिस्थितीत, कंपनी त्याबद्दल काय विचार करतेय, याबद्दल कोणतीही माहिती समोर आलेली नाही.
नवा गेम खास भारतीयांसाठी
त्याचबरोबर, या गेमची स्वतःची एसपोर्ट इकोसिस्टम आहे जी टुर्नामेंट आणि लीगसह सुसज्ज आहे. हा गेम मोबाईल डिव्हाइसवर फ्रूी टू प्ले उपलब्ध आहे. दरम्यान, असे म्हटले जात आहे की, बॅटलग्राउंड्स मोबाईल इंडिया सध्या केवळ भारतीय बाजारातच लाँच करण्यात आला आहे. म्हणजेच हा गेम खास भारतीयांसाठीच आहे. हा गेम लॉन्च होण्यापूर्वी प्री रजिस्ट्रेशनसाठी उपलब्ध करण्यात आला होता. तेव्हादेखील या गेमली Google Play Store वर 20 मिलियन प्री रजिस्ट्रेशन मिळाले होते आणि तेही अवघ्या 2 आठवड्यांत. निर्मात्यांनी यामध्ये ट्राय कलर (तिरंगी) थीम दिली आहे, जेणेकरुन भारतीय युजर्स याकडे आकर्षित होतील.
युजर्सचा डेटा सुरक्षित
गेम लॉन्च होण्यापूर्वी कंपनीने स्पष्ट केले होते की, गेमरचा डेटा कुठेही पाठवला जाणार नाही आणि तो पूर्णपणे सुरक्षित असेल. त्याचबरोबर कंपनी सरकारच्या सर्व महत्त्वपूर्ण मार्गदर्शक सूचनांचे पालन करेल. यात डेटा गोपनीयता आणि युजर्सच्या सुरक्षेचा समावेश असेल. कारण गेल्या सप्टेंबरमध्ये याच कारणास्तव या गेमवर भारतात बंदी घालण्यात आली होती.
जबरदस्त गेमप्ले
दरम्यान, PUBG Corporation ने म्हटलं आहे की, आमचं नवं गेमिंग अॅप युजर्सना जास्तीत जास्त सुरक्षा आणि जबरदस्त गेम प्ले प्रदान करेल. भारतीय प्लेयर्सशी सहज कम्युनिकेशन व्हावे यासाठी कंपनी एक सबसिडरी तयार केली जाणार आहे. तसेच कंपनी भारतात 100 कर्मचाऱ्यांना नोकरी देणार आहे. यासाठी कंपनी भारतात काही ठिकाणी लोकल कार्यालय सुरु केली जाणार आहे. कंपनी भारतात लोकल बिझनेससह गेमिंग सर्व्हिस देणार आहे.
Krafton Inc (PUBG Corporation ची पॅरेंट कंपनी) या कंपनीने भारतात 100 मिलियन डॉलर्सची गुंतवणूक करण्याची घोषणा केली आहे. ही गुंतवणूक मनोरंजन, लोकल गेम्स, ई-स्पोर्ट्स आणि आयटी इंडस्ट्रीसाठी असेल. PUBG Corporation च्या म्हणण्यानुसार ही कोणत्याही कोरियन कंपनीने भारतात केलेली सर्वात मोठी गुंतवणूक आहे.
काही मीडिया रिपोर्ट्सनुसार भारतीय प्लेअर्सना अधिक चांगला अनुभव प्रदान करण्यासाठी PUBG कॉर्पोरेशनने त्यांचा गेमिंग कॉन्टेंट अपडेट आणि अधिक अॅडव्हान्स केला आहे. भारतीय प्लेअर्सच्या इच्छेनुसार आणि मागणीनुसार नवा गेम कस्टमाईज करण्यात आला आहे.
कसा बनला पबजी गेम?
एक जपानी चित्रपट ‘बॅटल रोयाल’ पासून प्रेरणा घेऊन Pubg हा गेम बनवण्यात आला आहे. या चित्रपटात सरकार विद्यार्थ्यांच्या एका ग्रूपला बळजबरी करून मृत्यूशी लढायला पाठवतं. त्याच गोष्टीला धरून हा गेम बनवण्यात आला आहे.
हा गेम दक्षिण कोरियाची व्हीडिओ गेम कंपनी ब्लूहोलनं विकसित केला आहे. या कंपनीनं या गेमचं डेस्कटॉप व्हर्जन तयार केलं होतं. परंतु, चीनची कंपनी Tenncent ने काही बदल करून या गेमचं मोबाईल व्हर्जन लाँच केलं. डेस्कटॉप व्हर्जनपेक्षा मोबाईल व्हर्जनला जगभरात खूप प्रसिद्धी मिळाली. भारतात हा गेम सर्वात यशस्वी ठरला. जगभरात पब्जी खेळणाऱ्यांपैकी जवळपास 25 टक्के लोक भारतातील आहेत, 17 टक्के चीनमध्ये तर 6% गेमर्स अमेरिकेत आहेत. जगभरात हा गेम 60 कोटींपेक्षा अधिक लोकांनी डाऊनलोड केला आहे.
इतर बातम्या
कोरोना लसीबाबत अफवा पसरवणारे 100 हून अधिक अकाऊंट्स फेसबुककडून बॅन, जाणून घ्या संपूर्ण प्रकरण
(Battlegrounds Mobile India hits 50 million downloads, Krafton giving exclusive rewards to gamers)