‘अंधेरी नाक्यावरचे भिकारी…’, ‘प्रेतावरचं टाळू खाण्याचा…’, ठाकरे गटाच्या खासदाराची शिंदे गटावर टीका

मुंबई | 25 ऑक्टोंबर 2023 : शिवतीर्थवरचा दसरा मेळावा 1001% यशस्वी झाला. लाखोंच्या संख्येने शिवसैनिक आले होते. गाडीची सोय न करता, बिर्यानी खाऊ न घालता, पैसे न वाटता गर्दी जमली होती. उद्धव ठाकरे भाषण करत होते तेव्हा कोपरा आणि कोपरा भरला होता. स्वतःच झाकून ठेवायचं आणि दुसऱ्याच वाकून बघायचं ही आमची सवय नाही. विरोधकांचा हा पोरकटपणा आहे, अशी टीका ठाकरे गटाचे खासदार विनायक राऊत यांनी केली. आझाद मैदानावर गद्दारांचे नेते बोलत होते तेव्हा खुर्च्या रिकाम्या होत्या. एकनाथ शिंदे आणि त्यांच्या भाषणाकडे त्यांनी पाठ फिरवली. त्या ठिकाणी राम लीला सुरु होती तिथली लोकं आणली होती. अंधेरी नाक्यावरचे भिकारी यांनादेखील गाडीत बसवलं गेलं असा आरोपही त्यांनी केला.