छत्रपती संभाजीनगरमध्ये शिवशाही बसचा भीषण अपघात; 14 जण जखमी

छत्रपती संभाजीनगर : शिवशाही बसच्या अपघातांची मालिका मागील काही दिवसांपासून सुरूच आहे. आज सकाळी चार वाजेच्या सुमारास छत्रपती संभाजीनगर शहरातील बाबा पेट्रोल पंपावर शिवशाही बसचा भीषण अपघात झाला. या अपघातात बसच्या चालक वाहकांसह 14 जण जखमी झाले आहेत. त्यांना उपचारासाठी घाटी रुग्णालयात दाखल करण्यात आलं आहे. प्राथमिक माहितीनुसार ही शिवशाही बस नाशिक आगाराची आहे. छत्रपती संभाजीनगर बस स्थानकातून निघाल्यानंतर बाबा पेट्रोल पंपावर चालकाचे नियंत्रण सुटल्याने एका कंटेनरला धडकली. यामुळे हा अपघात झाल्याची प्राथमिक माहिती समोर आली आहे. सुदैवाने या अपघातात कुठलीही जीवित हानी झालेली नाही.