कॉंग्रेसवाले आणि भाजपावाले दोघेही मिलींद देवरांची जिरवतील, विजय वडेट्टीवार यांची टीका

मुंबई | 14 जानेवारी 24 : कॉंग्रसचे नेते मिलिंद देवरा यांनी शिवसेना एकनाथ गटात प्रवेश केला आहे. मिलिंद देवरा यांच्या प्रवेशाने कोणालाही फारसे आश्चर्य वाटलेले नाही. गेले अनेक दिवस ते कॉंग्रेस नेतृत्वावर नाराज होते. या प्रकरणात विरोधी पक्ष नेते विजय वडेट्टीवार यांनी मिलिंद देवरा यांच्यावर टीका केली आहे. दक्षिण मुंबईत लोकसभा मतदार संघात सिटींग खासदार शिवसेनेचे अरविंद सावंत आहेत, त्यामुळे या जागेवर शिवसेनेचाच हक्क आहे. खासदारकीच्या लोभापायी असा निर्णय घेणे अत्यंत चुकीचे आहे. नीतीमत्ता आणि नैतिकता संपुष्ठात आल्याचे हे द्योतक असल्याचे विजय वडेट्टीवार यांनी म्हटले आहे. या जागेवरुन मुळात भाजपा आणि एकनाथ गटात वाद सुरु आहेत. त्यामुळे त्यांना तिकीट मिळणारच नाही. आणि मिळाले तरी कॉंग्रेसवाले आणि भाजपावाले दोघेही मिलिंद देवरा यांची जिरवतील ते तेथून निवडून येणार नसल्याचा दावा विजय वडेट्टीवार यांनी केला आहे.