मुंबई, २३ नोव्हेंबर २०२३ : राज्यभरात मनोज जरांगे पाटील यांचा राज्यव्यापी दौरा सुरू आहे. अशातच मनोज जरांगे पाटील यांचं राज्यभरात ठिक-ठिकाणी जंगी स्वागत केले जात असल्याचे पाहायला मिळत आहे. तर काही ठिकाणी तब्बल १०० जेसीबीतून फुलांची आणि गुलालाचीही उधळण करण्यात आली. यावरूनच ठाकरे गटाच्या नेत्या सुषमा अंधारे यांनी मनोज जरांगे पाटील यांच्यावर जोरदार हल्लाबोल केला आहे. एकीकडे मागास म्हणता तर दुसरीकडे आडनावापुढे पाटील लावतात, असे म्हणत सुषमा अंधारे यांनी खोचक टोला लगावला आहे. तर मागास म्हणवून १०० जेसीबीतून फुलांची उधळण करतात? असा खोचक सवालही सुषमा अंधारे यांनी उपस्थित केला आहे. सुषमा अंधारे यांच्या टीकेवर आता मनोज जरांगे पाटील काय उत्तर देतात हे पाहणं महत्त्वाचं ठरणार आहे.