ठाणे, २२ सप्टेंबर २०२३ | एसटी बस आणि एसटी बस स्थानकात स्वच्छता राखली जावी यासाठी हिंदुहृदयसम्राट बाळासाहेब ठाकरे स्वच्छ सुंदर बस स्थानक अभियान 5 महिन्यांपूर्वी सुरू करण्यात आले आहे, परंतु एसटीच्या अस्वच्छ बसेस रस्त्यावर दिसत आहे. मात्र आता बस किंवा बस स्थानक जर अस्वच्छ असेल तर आगार प्रमुखालाच महागात पडणार आहे. कारण अस्वच्छ बसेस दिसल्यास आगार व्यवस्थापकाला 500 रुपयांचा दंड आकारण्यात येणार आहे. असा आदेश आता महामंडळाकडून काढण्यात आला आहेत. राज्यभरात 1 ऑक्टोबरपासून एसटीच्या वरिष्ठ अधिकाऱ्यांच्या मार्फत स्वच्छतेची तपासणी सुरू होणार आहे. या अभियानात बसेसच्या स्वच्छतेसाठी शंभर पैकी दहा गुण दिले जाणार आहेत. अभियान सुरू होऊन तब्बल पाच महिने होऊनही अपेक्षित परिणाम दिसून येत नसल्याने एसटी महामंडळ प्रशासनाकडून, एस टी आगारातील अधिकारी एस टी बस स्वच्छतेकडे विशेष लक्ष देत आहेत.