CNG : चायसे ज्यादा केतली गरम! पेट्रोल-डिझेलपेक्षा सीएनजीचे वाढले भाव, वाहनधारकांनी मारला डोक्याला हात
CNG : भीक नको पण कुत्र आवर, अशी अवस्था सीएनजी वाहनधारकांची झाली आहे..
नवी दिल्ली : देशभरात सीएनजीच्या किंमतींनी (CNG Price) वाहनधारकांना हैराण केल्याची चर्चा रंगली आहे. एकेकाळी सीएनजी किट बसवून अनेकांनी खिशावरचा भार हलका केला होता. पण आता सीएनजी वाहनधारकांच्या खिश्यावर तेल कंपन्यांनी दरोडा घातला आहे. वर्षभरात सीएनजीच्या भावात (CNG Price Hike 2022) 50 टक्क्यांची वाढ झाली आहे. त्यामुळे वाहनधारक हवाल दिल झाले आहेत. तर गेल्या सहा महिन्यात पेट्रोल-डिझेलच्या किंमती स्थिर असल्याने या वाहनधारकांना सध्या दिलासा मिळाला आहे.
मीडियातील अहवालानुसार, मार्चपासून आतापर्यंत सीएनजीच्या किंमतीत 15 वेळा वाढ करण्यात आली आहे. सीएनजीच्या किंमती 26 रुपयांहून अधिक वाढल्या आहेत. त्यामानाने पेट्रोल आणि डिझेलच्या किंमतीत (Petrol Diesel Rate Today) सहा महिन्यात काहीच वाढ झालेली नाही. जनआक्रोश वाढल्याने केंद्र आणि राज्य सरकारने पेट्रोल-डिझेलवर कर कपातही केली होती.
देशाची राजधानी दिल्लीत, वाहनधारकांना खऱ्या अर्थाने पेट्रोल-डिझेलने नाही तर सीएनजीने रडवले आहे. यावर्षी सीएनजीच्या किंमतीत आतापर्यंत 50 टक्क्यांची वाढ झाली आहे. गेल्या वर्षी डिसेंबर महिन्यात सीएनजीच्या किंमतीत वाढ झाली होती. त्यानंतर ब्रेक घेत मार्च 2022 मध्ये किंमती वाढल्या.
मार्च 2022 पासून सीएनजीला ग्रहण लागलेले आहे. गेल्या वर्षभरात सीएनजीच्या किंमतीत 26.52 रुपयांची वाढ झाली आहे. सध्या सीएनजीचा भाव 79.56 रुपये झाला आहे. गेल्यावर्षीच्या अखेरीस हा दर 53 रुपये होता. त्यानंतर किंमतींना वाढीचे ग्रहण लागले.
सीएनजीनंतर यंदा डिझेलच्या किंमतीत 3 रुपयांची वाढ दिसून आली. डिझेलच्या किंमतीत 22 मे नंतर कुठलीही भरीव वाढ दिसून आली नाही. पण वर्षभरात डिझेलमध्ये जवळपास 3 रुपये प्रति लिटरची वाढ दिसून आली आहे.
31 डिसेंबर 2021 रोजी डिझेलचा भाव 86.67 रुपये प्रति लिटर होता, सध्या हा भाव 89.62 रुपये प्रति लिटर आहे. याचा अर्थ यंदा, 2022 डिझेलच्या किंमतीत 2.95 रुपये प्रति लिटरची वाढ दिसून आली आहे.
तर पेट्रोलमध्ये नगण्य भाव वाढ झालेली आहे. आकड्यांवर नजर टाकली असता, यंदा, 2022 मध्ये पेट्रोलच्या किंमतीत प्रति लिटर दीड रुपयांची वाढ झाली. दिल्लीसह देशातील अनेक मोठ्या शहरात सहा महिन्यांचा कालावधी उलटून गेला आहे, पण पेट्रोलच्या आघाडीवर शांतता आहे.
31 डिसेंबर 2021 रोजी पेट्रोलचा भाव 95.41 रुपये प्रति लिटर होते. हा भाव आज 96.72 रुपये प्रति लिटर झाला आहे. याचा अर्थ यंदा पेट्रोलच्या किंमतीत 1.31 रुपये प्रति लिटरची वाढ दिसून आली आहे.
