नांदेडमध्ये देशातील सर्वात महाग इंधन, धर्माबादमध्ये पेट्रोल नाबाद 98

Petrol

नांदेड : पेट्रोल-डिझेलच्या किमती दिवसेंदिवस गगनाला भिडत आहेत. इंधनाच्या दरवाढीमुळे वाहनचालकांचं कंबरडं मोडण्याची वेळ आली आहे. नांदेडमध्ये महाराष्ट्रच नव्हे, तर संपूर्ण देशात सर्वात महागडे पेट्रोल विकलं जात आहे. नांदेडमध्ये पेट्रोलचे दर शंभरीच्या उंबरठ्यावर आले आहेत. (Nanded Dharmabad Costliest Petrol Diesel)

धर्माबादमध्ये महाग पेट्रोल का?

नांदेड जिल्ह्यातील धर्माबादमध्ये एक लीटर पेट्रोलसाठी 98 रुपये 29 पैसे मोजावे लागत आहेत. तर डिझेलसाठी 87 रुपये 70 पैसे द्यावे लागत आहेत. धर्माबादला सोलापूरच्या ऑइल डेपोतून इंधन पुरवठा होतो, हे अंतर अधिकचे असल्याने इथे इंधनाचे दर सर्वाधिक आहेत. मात्र शेजारी असलेल्या तेलंगणा राज्यात प्रति लिटर पाच रुपयाने इंधन स्वस्त आहे.

भोपाळमध्ये प्रीमियम पेट्रोलची किंमत 100 रुपयांवर

बहुतांश शहरांमध्ये पेट्रोलच्या किमती 90 पार पोहोचल्या आहेत. महानगरांमध्ये पेट्रोलचे दर 95 च्याही पुढे गेले आहेत. मध्य प्रदेशातील भोपाळमध्ये प्रीमियम पेट्रोलची किंमत 100 रुपयांवर पोहोचली आहे. अतिरिक्त प्रीमियम पेट्रोलची किंमत प्रति लिटर 99.99 रुपये आहे. तर साध्या पेट्रोलची किंमत प्रतिलिटर 96.69 रुपयांवर पोहोचली आहे. यावेळी डिझेल 87.20 रुपये तर प्रीमियम डिझेलची किंमत 91.31 रुपयांवर गेली आहे.

सात दिवसात इंधनाच्या किमती किती वाढल्या?

गेल्या सात दिवसात पेट्रोलच्या किमतीत 2.08 रुपयांची वाढ झाली आहे तर डिझेलच्या किंमतीत प्रतिलिटर 2.23 रुपये वाढ झाली. आता फक्त फेब्रुवारी महिन्याबद्दलच बोलायचं झालं तर डिझेलच्या किंमतीमध्ये 2.58 रुपये आणि पेट्रोलमध्ये 2.43 रुपये प्रतिलिटर वाढ झाली. जागतिक बाजारपेठेतील तेजीमुळे स्थानिक शहरांमध्ये कंपन्यांनी पेट्रोल-डिझेलचे भाव वाढवले.

तीन अंकी डिस्प्लेच नाही

सगळ्यात महत्त्वाचं म्हणजे याचा थेट परिणाम पेट्रोल पंपांवर झाला आहे. कारण पेट्रोलच्या मशीनमध्ये 3 अंकी डिस्पेलच नाही आहे. त्यामुळे अनेक नागरिकांनी ऐन सुट्टीच्या दिवशी मनस्ताप सहन करावा लागत आहे.

प्रमुख शहरांमध्ये पेट्रोलचे दर

दिल्ली (Delhi Petrol Price Today): 88.73 रुपये प्रतिलिटर

मुंबई (Mumbai Petrol Price Today): 95.21 रुपये प्रतिलिटर

कोलकाता (Kolkata Petrol Price Today):90.01 रुपये प्रतिलिटर

चेन्नई (Chennai Petrol Price Today): 90.96 रुपये प्रतिलिटर

नोएडा (Noida Petrol Price Today): 87.50 रुपये प्रतिलिटर

संबंधित बातम्या :

Petrol at 100: ऐन महागाईत पेट्रोलचंही शतक, 3 अंकी किंमतीमुळे पंप पडले बंद

(Nanded Dharmabad Costliest Petrol Diesel)