Today Petrol, Diesel Rate : सीएनजीच्या दरात मोठी वाढ; पेट्रोल, डिझेलची काय स्थिती?, जाणून घ्या नवे दर
Petrol, Diesel Rate देशातील प्रमुख पेट्रोलियम कंपन्यांकडून इंधनाचे नवे दर जारी करण्यात आले आहेत. जाणून घेऊयात आजचे पेट्रोल, डिझेलचे दर
मुंबई : देशातील प्रमुख पेट्रोलियम कंपन्यांकडून इंधनाचे नवे दर जारी करण्यात आले आहेत. नव्या दरानुसार आज देखील पेट्रोल, डिझेलच्या दरात (Petrol, Diesel Rate) कोणताही बदल करण्यात आलेला नाही. गेल्या दोन महिन्यांपेक्षा अधिक कालावधीपासून राज्यात पेट्रोल (Petrol), डिझेलचे (Diesel) दर स्थिर आहेत. 21 मे रोजी केंद्र सरकारने पेट्रोलच्या एक्साईज ड्यूटीमध्ये कपातीची घोषणा केली होती. त्यानंतर 22 मे रोजी पेट्रोल साडेनऊ रुपयांनी तर डिझेल सहा रुपये प्रति लिटरने स्वस्त झाले. तेव्हापासून पेट्रोल, डिझेलेच दर स्थिर आहेत. राशिया, युक्रेन युद्धाच्या पार्श्वभूमीवर कच्च्या तेलाचे दर गगनाला भिडले होते, तेव्हा देखील पेट्रोल, डिझेलचे दर स्थिर ठेवण्यात आले होते. तर आता कच्च्या तेलाच्या दरात मोठी घसरण झाली आहे. घसरणीनंतर कच्च्या तेलाचे दर प्रति बॅरल 100 डॉलरवर पोहोचले आहेत. तरी देखील देशात इंधनाचे दर कमी न करता स्थिरच ठेवण्यात आले आहेत. जाणून घेऊयात देशासह राज्यातील प्रमुख शहरांमधील इंधनाचे दर
देशाच्या प्रमुख महानगरातील दर
पेट्रोलियम कंपन्यांकडून आज जारी करण्यात आलेल्या नव्या दरानुसार राजधानी दिल्लीमध्ये पेट्रोलचा भाव प्रति लिटर 96.72 रुपये एवढा आहे. तर डिझेलचा दर प्रति लिटर 89.62 रुपये इतका आहे. मुंबईमध्ये पेट्रोलचा दर प्रति लिटर 106.35 रुपये असून, डिझेलचा भाव प्रति लिटर 94.28 रुपये इतका आहे. चेन्नईमध्ये पेट्रोलचा दर प्रति लिटर 102.63 रुपये असून, डिझेलचा दर प्रति लिटर 94.24 रुपये इतका आहे. कोलकातामध्ये पेट्रोलचा दर प्रति लिटर 106.03 रुपये असून, डिझेलचा दर प्रति लिटर 92.76 रुपये इतका आहे.
राज्याच्या प्रमुख शहरातील इंधनाचे दर
| शहरं | पेट्रोल | डिझेल |
|---|---|---|
| मुंबई | 106.35 | 94.28 |
| पुणे | 106.10 | 92.58 |
| नाशिक | 106.22 | 92.70 |
| नागपूर | 106.65 | 93.14 |
| कोल्हापूर | 106.02 | 92.54 |
सीएनजी महागला
एकीकडे देशात गेल्या दोन महिन्यांपासून पेट्रोल, डिझेलचे दर स्थिर आहेत. मात्र दुसरीकडे सीएनजी, पीएनजीच्या दरात वाढ सुरूच आहे. आज पुन्हा एकदा मुंबईत सीएनजीच्या दरात प्रति किलो सहा रुपयांची वाढ करण्यात आली आहे. तर पीएनजी देखील चार रुपयांनी महागला आहे. वाढत असलेल्या या महागाईचा मोठा फटका सर्वसामान्य नागरिकांना बसताना दिसून येत आहे.
