लज्जास्पद! पोळी लाटताना थुंकीचा वापर, व्हिडीओ व्हायरल होताच अखेर आरोपीला अटक
उत्तर प्रदेशमधील एका हॉटेलमध्ये एका कर्मचारी पोळ्या करताना त्यावर थुंकल्याचे गंभीर प्रकरण नुकतेच समोर आले आहे. पोलिसांनी संबंधित आरोपीला अटक करत त्याच्यावर गुन्हा दाखल केला आहे. यापूर्वी लखनऊ आणि मेरठ येथेही असे प्रकार घडले होते.
अन्न हे पूर्णब्रह्म ! ताटात वाढलेले सगळं जेवण संपवावे, स्वयंपाक करताना प्रसन्न चित्ताने करावा, म्हणजे ते अन्न खाणा-याच्या अंगी लागते. असे अनेक लहान-मोठे सल्ले आपण लहानपणापासून ऐकत असतो. मात्र हेच अन्न तयार करताना कोणी लज्जास्पद, घृणास्पद कृत्य करत असेल तर? उत्तर प्रदेशमधील (Uttar Pradesh) एका हॉटेलमधील कर्मचारी पोळ्या तयार करताना त्यामध्ये थुंकत (Man spitting on Roti) असल्याचा गंभीर प्रकार नुकताच उघडकीस आला आहे. बिजनौर येथील हॉटेलमध्ये अरबाज नावाचा कर्मचारी पोळ्या करताना त्यावर थुंकत असताना पकडला गेला आहे. या घटनेचा व्हिडीओ व्हायरल (Video Viral) झाला आहे. त्यानंतर पोलिसांनी संबंधित आरोपी अरबाजला अटक केली आहे. नजीबाबाद जवळील जलालाबाद येथील हॉटेलमध्ये ही घटना घडली आहे. पोलिसांनी अरबाज विरोधात अनेक गंभीर गुन्हे दाखल केले आहेत. यापूर्वी राजधानी लखनऊ आणि मेरठ येथेही असे प्रकार घडले होते.
काय आहे प्रकरण?
जलालाबाद येथे सदाबहार नावाचे हॉटेल आहे. तेथे मांसाहारी जेवण मिळते. तेथे जेवणासाठी आलेल्या एका ग्राहकाने जेव्हा हॉटेलमधील कर्मचा-याला पोळी लाटताना पाहिले, तेव्हा तो आश्चर्यचकित झाला. तो कर्मचारी पोळ्या बनवताना थुंकीचा वापर करत होता. हे पाहताच त्या ग्राहकाने तातडीने त्याचे हे कृत्य कॅमे-यात कैद केले आणि हा व्हिडीओ व्हायरल झाला.
पोलिसांनी केली चौकशी
या घटनेची माहिती पोलिसांना तातडीने देण्यात आली असता, त्यांनी हॉटेलचा कर्मचारी अरबाज याला अटक केली. हे घृणास्पद कृत्य तो का आणि कधीपासून करत आहे, याबद्दल पोलीस अरबाजची कसून चौकशी करत आहेत. पोलिसांनी आरोपीविरोधात भादंविच्या कलम 269 आणि 270 अन्वये गुन्हा दाखल केला आहे.
यापूर्वीही घडले आहेत असे प्रकार
पोळ्या बनवताना कर्मचा-याने थुंकीचा वापर केल्याच्या अशा घटना यापूर्वीही घडल्या आहेत. गेल्या वर्षी राजधानी लखनऊ येथील काकोरी परिसरातील एका भोजनालयात असा प्रकार घडला होता. तेथील एक कर्मचारी कणकेत थुंकताना पकडला गेला होता. त्या घटनेचा व्हिडीओही खूप व्हायरल झाला होता. याप्रकरणी पोलिसांनी पाच जणांना अटक केली होती. त्यानंतर फेब्रुवारी महिन्यात मेरठमध्येही असा प्रकार उघडकीस आला. तेथेही एका कर्मचा-या कणकेवर थुंकल्याप्रकरणी अटक करण्यात आली. तो एका लग्नसमारंभादरम्यान असे कृत्य करताना कॅमे-यात कैद झाला होता. त्या आरोपीचे नाव नौशाद असे होते.
