Dombivali Crime :पोलीस असल्याची बतावणी करत घेऊन गेले, दोघांकडून अल्पवयीन मुलीवर लैंगिक अत्याचार
पीडित मुलगी इयत्ता बारावीची विद्यार्थिनी असून, शुक्रवारी दुपारी मित्रासोबत डोंबिवली लागून असलेल्या ठाकुर्ली खाडी किनारा परिसरात फिरायला गेली होती. यावेळी दोघे आरोपी तेथे आले आणि त्यांनी आपण पोलीस असल्याची बतावणी केली.
डोंबिवली : कल्याण आणि डोंबिवली शहरात गेल्या दोन वर्षात बलात्काराच्या घटनांमध्ये वाढ होत आहे. डोंबिवली आणि कल्याण ही दोन्ही शहर या अगोदर सामूहिक बलात्काराच्या घटनेने हादरली असताना पुन्हा एकदा डोंबिवलीमध्ये बलात्काराचा धक्कादायक प्रकार समोर आलाय. विशेष बाब म्हणजे पोलीस असल्याची बतावणी करत दोघांनी एका अल्पवयीन मुलीवर बलात्कार केला आहे. मोठ्या साहेबांकडे चौकशीसाठी नेण्याचा बहाणा करत निर्जन ठिकाणी नेत दोघांनी अल्पवयीन मुलीवर अत्याचार केला. याप्रकरणी विष्णुनगर पोलिसांनी गुन्हा दाखल करीत पुढील तपास सुरू केला आहे. दोघेही आरोपी फरार असून, विष्णुनगर पोलीस त्यांचा शोध घेत आहेत. मित्रासोबत फिरायला गेली असताना ही घटना घडली आहे.
मित्रासोबत फिरायला गेली होती मुलगी
पीडित मुलगी इयत्ता बारावीची विद्यार्थिनी असून, शुक्रवारी दुपारी मित्रासोबत डोंबिवली लागून असलेल्या ठाकुर्ली खाडी किनारा परिसरात फिरायला गेली होती. यावेळी दोघे आरोपी तेथे आले आणि त्यांनी आपण पोलीस असल्याची बतावणी केली.
पोलीस असल्याची बतावणी करत बलात्कार
इतकंच नाही तर तुम्ही इथे फिरताय हे तुमच्या पालकांना सांगण्याची धमकीही त्यांनी दिली. यापैकी एक तरुण मुलीच्या मित्राला घेऊन स्टेशन परिसरात गेला. आमचे साहेब इथे बसले तू त्यांच्याशी बोल असं सांगत त्याने तरुणाला गुंतून ठेवलं.
दरम्यानच्या वेळात दुसरा आरोपी हा तरुणीला घेऊन काही अंतरावर गेला आणि तिच्यावर बलात्कार केला. दुसरा आरोपीही मुलाला सोडून पुन्हा त्या ठिकाणी आला आणि त्यानेही मुलीवर बलात्कार केला. हा सर्व प्रकार मुलीने आपल्या घरच्यांना सांगितला.
विष्णुनगर पोलिसात गुन्हा दाखल
सुरवातीला रेल्वे पोलिसंकडे तक्रार करण्यात आली. मात्र नंतर हे प्रकरण शहर पोलिसांकडे येत असल्याने रात्री बारा वाजता विष्णुनगर पोलिसांनी याप्रकरणी गुन्हा दाखल करत तपास सुरू केला आहे. तपासासाठी पाच पथकं नेमण्यात आली आहेत.
ठाकुर्ली खाडी किनारा, बावन चाळ परिसर निर्जन असल्याने तरुण-तरूणींनी या ठिकाणी जाणं टाळावे अशा भावना व्यक्त होत आहे. काही वर्षांपूर्वी बावन चाळ परीसरातही अशीच घटना घडली होती.
