ओव्हरटेक करताना वाद झाला, ट्रक चालकाने कारला 500 मीटर फरफटत नेले
गाडीतील प्रवाशांनी विरोध केल्यावर चालकाने पुन्हा ट्रकमध्ये बसून ट्रक सुरू केला. यानंतर त्यांनी पुन्हा कारला धडक दिली. त्याचा राग इथेच थांबला नाही, धडकल्यानंतर ट्रक चालकाने कार सुमारे 500 मीटरपर्यंत फरफटत नेली.
शाहजहापूर : ओव्हरटेक करताना झालेल्या वादातून ट्रक चालकाने कारला धडक देत सुमारे 500 मीटर फरफटत नेल्याची घटना शाहजहापूर येथे घडली आहे. सुभाष चौक ते चौकी ट्रक चालक कारला फरफटत घेऊन गेला. या घटनेत कारमधील सर्व जण सुदैवाने बचावले आहेत. घटनेवेळी ट्रक चालक दारुच्या नशेत असल्याचे कळते. ही घटना उघड होताच सर्वत्र खळबळ माजली आहे. पोलिसांनी ट्रक चालकाला ताब्यात घेतले असून, त्याची चौकशी सुरु आहे.
काय आहे प्रकरण?
रोजा पोलीस ठाण्याच्या हद्दीतील सुभाष चौकाजवळ बुधवारी रात्री उशिरा एका भरधाव ट्रकने कारला धडक दिली. अपघातानंतर ट्रकचालक आणि कारचालक यांच्यात वाद झाला.
गाडीतील प्रवाशांनी विरोध केल्यावर चालकाने पुन्हा ट्रकमध्ये बसून ट्रक सुरू केला. यानंतर त्यांनी पुन्हा कारला धडक दिली. त्याचा राग इथेच थांबला नाही, धडकल्यानंतर ट्रक चालकाने कार सुमारे 500 मीटरपर्यंत फरफटत नेली.
आरोपी ट्रक चालकाला ताब्यात घेतले
कारमधील चालक आणि इतर लोक सुदैवाने बचावले आहेत. आरडाओरडा ऐकून पोलीस चौकीत तैनात असलेले हवालदार घटनास्थळी पोहोचले. आरोपी ट्रक चालकाला ताब्यात घेतल्यानंतर, पोलिसांनी ट्रक मालकाला घटनास्थळी बोलावून चौकशी केली.
दिल्लीत गाडीच्या बोनेटवर तरुणाला फरफटत नेले
दिल्लीतील राजौरी गार्डन परिसरात हॉर्नच्या वादातून दोन गटात हाणामारी झाली. रागाच्या भरात कारमधील तरुणाने एका व्यक्तीला धडक दिली. यानंतर त्याने तरुणाला बोनेटवर अर्धा किलोमीटर नेले. या घटनेचा व्हिडिओ मोठ्या प्रमाणात व्हायरल झाला.
