पत्नी करत होती शिफ्ट ड्युटी, पतीला वाटले कुणासोबत तरी लफडं सुरुंय; संशयातून उचलले टोकाचे पाऊल

बडवाणी : विवाहबाह्य संबंधाच्या संशयातून नोकरी करणाऱ्या महिलेला प्राण गमवावा लागल्याची घटना मध्य प्रदेशात घडली आहे. पत्नी दिवस-रात्र कधीही ड्युटीवर जाते. यामागे काहीतरी वाईट कारण असू शकेल, अशी शंका पतीच्या मनात वारंवार डोकावत होती. याच विवाहबाह्य संबंधाच्या संशयातून पतीने पत्नीची निर्घृण हत्या केली. बडवाणी येथील खाजगी हॉस्पिटलमध्ये ही महिला काम करत होती. हॉस्पिटलच्या कामानिमित्त तिला अधूनमधून शहराबाहेरही जावे लागायचे. तिच्या याच शेड्युलवरून पतीने तिच्या चारित्र्यावर संशय घेण्यास सुरुवात केली होती. हा संशय अखेर पत्नीच्या जीवावर बेतला. पतीने कुऱ्हाडीने मानेवर वार करून तिची हत्या केली. या घटनेने परिसरात प्रचंड खळबळ उडाली आहे.

मध्यरात्री उशिरा घडली धक्कादायक घटना

शनिवारी मध्यरात्री साडेबारा वाजण्याच्या सुमारास ही धक्कादायक घटना घडली. उपलब्ध पुरावे तसेच प्रत्यक्षदर्शी साक्षीदारांनी दिलेल्या जबाबाच्या आधारे पोलिसांनी आरोपी पतीला अटक केली आहे.

आरोपीचे त्याच्या पत्नीसोबत आणखी कुठल्या कारणावरून वाद व्हायचे का?, तसेच या प्रकरणात गुन्ह्यासाठी आणखी कोणी मदत केली आहे का?, याचा तपास स्थानिक पोलिसांकडून सुरु आहे. देवेंद्र गुर्जर असे आरोपीचे नाव असून त्याला न्यायालयापुढे हजर करण्यात येणार आहे.

पत्नीच्या सततच्या नाईट ड्युटीमुळे वाद

आरोपी देवेंद्रची पत्नी लिना ही एका खाजगी हॉस्पिटलमध्ये काम करत होती. तिच्या कामाची वेळ नेहमी बदलत असायची. याच शेड्युलवरून देवेंद्रचे लीनासोबत वारंवार भांडण व्हायचे. लीना अनेकदा नाईट शिफ्टच्या ड्युटीला जायची. तसेच अधूनमधून शहराबाहेर जायला लागायचे.

यावरून देवेंद्र हा लीनाच्या चारित्र्यावर संशय घेत असायचा. लिना ही त्याच्या दाव्याचे वारंवार खंडन करायची. मात्र देवेंद्रला तिच्या बोलण्यावर विश्वास नव्हता. त्यामुळे पत्नीला काहीही करून जीवे मारायचे असा प्लान देवेंद्रने केला. अखेर शनिवारी मध्यरात्री पत्नीच्या मानेवर कुऱ्हाडीने वार करून तिला आपल्या आयुष्यातून कायमचे दूर केले.