उपराजधानीत सेक्स रॅकेटचा पर्दाफाश, ‘असा’ अडकला आरोपी पोलिसांच्या जाळ्यात
मॉडेलिंगसाठी वाट्टेल ते करायला तयार होती. तिने फोटोसेशन करून घेतले होते. अनेक कंपनीकडे फोटो पाठवूनही तिला कुठूनही ऑफर्स येत नव्हत्या. यामुळे काही कालावधीनंतर ती नैराश्यात गेली होती.
नागपूर / सुनील जाधव (प्रतिनिधी) : चंदेरी दुनियेच्या आकर्षणातून तरुणींची फसवणूक होण्याचे प्रकार खूप घडत आहेत. मुंबई, पुण्यासारख्या शहरांप्रमाणेच नागपूरमध्येही तरुणींना चंदेरी दुनियेच्या मोहपाशात अडकवून त्यांना वेश्याव्यवसायात लोटले जात आहे. नुकत्याच उघडकीस आलेल्या घटनेने हे धक्कादायक वास्तव समोर आले आहे. मॉडलिंगचे स्वप्न उराशी बाळगून घराबाहेर पडलेल्या तरुणीला सेक्स रॅकेटमध्ये सहभागी करून घेतले गेले. हा प्रकार उघड झाल्यानंतर नागपूर पोलिसांच्या गुन्हे शाखेने एका दलालाला अटक केली असून, त्याच्या चौकशीतून विविध धक्कादायक बाबींचा उलगडा झाला आहे. विक्की राजू कदमवार असे अटक केलेल्या 31 वर्षीय दलालाचे नाव आहे.
तरुणी पैशांच्या लालसेने सेक्स रॅकेटकडे वळली!
फसवणूक झालेली तरुणी ही मुळची मध्यप्रदेशच्या पांढुर्णा जिल्ह्यातील आहे. मॉडेलिंगमध्ये करिअर करण्यासाठी ही तरुणी घरातून आली होती. याचदरम्यान तिचा नागपूर येथील काही लोकांशी संबंध आला.
मॉडेलिंगसाठी वाट्टेल ते करायला तयार होती. तिने फोटोसेशन करून घेतले होते. अनेक कंपनीकडे फोटो पाठवूनही तिला कुठूनही ऑफर्स येत नव्हत्या. यामुळे काही कालावधीनंतर ती नैराश्यात गेली होती.
तिला या नैराश्येतून बाहेर काढण्यासाठी आणि सहज पैसे कमावण्यासाठी तिच्या मैत्रिणींनी चुकीचा मार्ग दाखवला आणि ती तरुणी सेक्स रॅकेटच्या दिशेने वळली.
गुप्त माहितीच्या आधारे पोलिसांनी केली कारवाई
दरम्यानच्या काळात पीडित तरुणीची अटक दलाल विक्कीशी ओळख झाली होती. त्याच्याच सांगण्यावरून ती ‘फोटो शूट’च्या नावाखाली देहव्यापारात सहभागी झाली होती. या सर्व प्रकारची गुप्त माहिती नागपूर पोलिसांच्या समाजसेवा शाखेला मिळाली होती.
गुप्त माहितीच्या आधारे पोलिसांनी डमी ग्राहकामार्फत सापळा रचला आणि पोलीस विक्कीपर्यंत पोहोचले. विकी हा सेक्स रॅकेटमध्ये मिळणाऱ्या पैशांपैकी 60 टक्के रक्कम पीडित तरुणीला देत असे.
पोलिसांनी डमी ग्राहकामार्फत कारवाई करताना विकीला अटक केली असून त्याच्याविरुद्ध विविध भादंवि कलमान्वये गुन्हा दाखल केला आहे. पोलिसांनी दिलेल्या माहितीनुसार आरोपी विक्की गेल्या अनेक वर्षापासून देहाव्यापारात दलाल म्हणून सक्रिय आहे.
आरोपीने आतापर्यंत अनेक मुलींना देहव्यापारात ढकलले
आरोपीने आतापर्यंत अनेक अल्पवयीन मुली आणि शाळकरी मुलींना देहव्यापारात ढकलले आहे. तो नागपुरातील ओयो हॉटेल्स आणि इतर नामांकित हॉटेल्समध्ये रूम बुक करून ग्राहकांच्या मागणीनुसार त्यांना मुली पुरविण्याचे काम करायचा. नागपूर पोलिसांनी एका नामांकित हॉटेलमध्ये छापा टाकून केलेल्या कारवाईत ही धक्कादायक बाब उजेडात आली आहे.
