Akola Accident : शिवशाही बसमधील 35 प्रवाशांवर काळ आला होता, पण वेळ आली नव्हती! टेम्पो चालक मात्र जागीच ठार
Akola Accident News : राष्ट्रीय महामार्ग व्याळाजवळ सकाळच्या सुमारास हा अपघात घडला
अकोला : अकोल्यात टेम्पो आणि शिवशाही बसची (Akola Accident News) समोरासमोर जोरदार धडक झाली. या भीषण अपघातातमध्ये (Akola Shivshahi bus And tempo Accident) चालक जागीच ठार झाला. तर एक जण गंभीर जखमी झालाय. या अपघातात टेम्पोचं मोठं नुकसान झालं. तर शिवशाही बसच्या दर्शनी भागाचंही नुकसान झालंय. बाळापूर पोलीस (Akola Crime News) ठाण्याच्या हद्दीत हा अपघात झाला. अजय तिकांडे असं अपघातात मृत्यू झालेल्या टेम्पो चालकाचं नाव आहे. तर गजानन धर्माळे हा जखमी झाला असून त्याच्यावर उपचार सुरु आहेत. राष्ट्रीय महामार्ग व्याळाजवळ सकाळच्या सुमारास हा अपघात घडला होता. बाळापूर पोलीस ठाण्याच्या हद्दीतील व्याळानजीक शिवशाही बस आणि टेम्पो यांची समोरसमोरच जोरदार टक्कर झाली. नागपूर-शेगाव या शिवशाही बसला समोरुन भरधाव वेगाने येणाऱ्या मालवाहू टेम्पोने ओव्हरटेक करताना जोरदार धडक दिली. हा अपघात इतका भीषण होता की, टेम्पो चालकाला ओव्हरटेकींगचा नाद जीवावर बेतला. बसच्या धडकेत टेम्पो चालक अजय तिकांडे (46) जागीच मृत्यूमुखी पडला. या अपघातानंतर काही काळ या मार्गावरीच वाहतूक विस्कळीत झाली होती.
टेम्पो चालकावर काळाचा घाला
या अपघाताची माहिती मिळाल्यानंतर तातडीन बाळापूर पोलिसांनी घटनास्थळी धाव घेतली आणि अपघाताचा पंचनामा केला. तर गजानन धर्माळे (30) हा या अपघातातून थोडक्यात बचावला. धर्माळे याला पोलिसांनी तातडीनं रुग्णालयात उपचारासाठी दाखल केलं.
35 प्रवासी थोडक्यात वाचले
शिवशाही बसमध्ये एकूण 35 प्रवासी होते. शिवशाही बसच्या चालकाने प्रसंगावधान राखल्यामुळे मोठा अनर्थ टळला. बसमधील सर्व प्रवासी सुखरुप असून टेम्पोचा मात्र चक्काचूर झाला. या अपघातामध्ये बसच्या समोरची काचेचं नुकसान झालेलं होतं. बाळकृष्ण मोरे असं शिवशाही बसच्या चालकाचं नाव असून ज्ञानेश्वर शेगोकार हे शिवशाही बसचे वाहक म्हणून यावेळी कर्तव्यावर होते.
या अपघातमध्ये शिवशाही बस चालकानं प्रसंगावधान राखल्यामुळे बसमधील प्रवासी थोडक्यात बचावलेत. शिवशाही बसचा क्रमांच एमएच 06 बी डब्ल्यू 3562 असू अपघातग्रस्त मालवाहू टेम्पोचा क्रमाक MH 27 BX 2231 आहे.
