CCTV : चालकानं छेड काढल्यानं धावत्या रिक्षातून तरुणीची उडी! औरंगाबाद हादरलं
ठाण्यानंतर आता औरंगबाद जिल्ह्यातही रिक्षा चालकानं संतापजनक कृत्य सीसीटीव्ही कॅमेऱ्यात कैद, पाहा व्हिडीओ
औरंगाबाद : ठाण्यानंतर (Thane News) आता औरंगाबादेत (Aurangabad Crime News) रिक्षातून जाणाऱ्या एका मुलीची रिक्षा चालकाने छेड काढण्याचा प्रयत्न केला. घाबरलेल्या मुलीने त्यामुळे धावत्या रिक्षातूनच उडी टाकली. या घटनेत मुलगी रस्त्यावर कोसळली आणि गंभीर जखमी झाली. यानंतर रिक्षा चालकाने मुलीची मदत करण्याऐवजी तिथून पळ काढला. ही धक्कादायक घटना सीसीटीव्ही कॅमेऱ्यातही (CCTV Video) कैद झालीय. औरंगाबाद शहरातच घडलेल्या या प्रकराने तीव्र संताप व्यक्त केला जातोय. तसंच मुलींच्या सुरक्षेचा प्रश्नही उपस्थित झालाय.
एक अल्पवयीन मुलगी क्लासवरुन परतत होती. त्यावेळी रिक्षातून प्रवास करताना रिक्षा चालकाने पीडित मुलीशी अश्लिल संभाषण केल्याचा आरोप करण्यात आलाय. भयभीत झालेल्या मुलीनं रिक्षा चालक छेड काढत असल्यानं धावत्या रिक्षातूनच उडी टाकली.
धावत्या रिक्षातून उडी टाकल्यानं मुलीच्या डोक्याला गंभीर मार लागला. ज्या वेळी मुलीने रिक्षातून उडी टाकली, तेव्हा रस्त्यावर वाहनांची वर्दळ होती. मागून येणाऱ्या वाहनांना आणि दुचाकीखाली ही मुलगी येण्याची भीती होती. मात्र मागील वाहनांनी प्रसंगावधान राखल्यानं थोडक्यात मोठा अनर्थ टळला.
पाहा व्हिडीओ :
25 व्या सेकंदाला पाहा काय घडलं..! मुलींनी रिक्षातून प्रवास करताना अधिक काळजी घ्यावी, घटना औरंगाबादची #CCTV #Aurangabad #Girl #AutoRikshaw pic.twitter.com/ynDwE5SsBo
— Siddhesh Sawant (@ssidsawant) November 16, 2022
औरंगाबाद शहरातील शिल्लेखाना चौक ते शिवायी हायस्कूल दरम्यान सदर घटना घडली. 13 नोव्हेंबर रोजी घडलेल्या या घटनेप्रकरणी पोलिसांनी आरोपी रिक्षा चालकाला अटकही केलीय. सय्यद अकबर सय्यद हमीद असं रिक्षा चालकाचं नाव आहे.
सीसीटीव्ही फुटेजच्या मदतीने आरोपी रिक्षा चालकाला क्रांती चौक पोलिसांनी ताब्यात घेतलं. सध्या त्याची कसून चौकशी केली जातेय. तर गंभीर जखमी मुलीवर खासगी रुग्णालयात उपचार सुरु आहेत.
दरम्यान, या संपातजनक घटनेनंतर वरिष्ठ पोलीस निरीक्षक डॉ. गणपत दराडे यांनी महिलांना महत्त्वाचं आवाहन केलंय. महिलांनी रिक्षातून किंवा एकटं असताना इतर कोणत्याही वाहनातून प्रवेश करताना आधी संबंधित वाहनाचा फोटो आपल्या मोबाईलमध्ये काढावा, असं आवाहन पोलिसांनी केलंय. सुरक्षेच्या दृष्टीने महिलांनी ही सतर्कता बाळगावी, असा सल्ला पोलिसांकडून देण्यात आलाय.
