मित्रांसोबत ऋषिकेशला फिरायला गेला, मात्र घरी परतलाच नाही, पोलीस तपासात जे उघड झाले त्यानंतर सर्वच हादरले !
चौघे मित्र दिल्लीहून हरिद्वार आणि ऋषिकेश फिरायला गेले होते. मात्र त्यापैकी तिघेच घरी परतले. चौथा मित्र गायब होता. पोलिसांनी चौथ्याचा शोध घेतला असता भयंकर घटना उघडकीस आली आहे.
दिल्ली : मैत्रीच्या नात्याला काळिमा फासणारी घटना दिल्लीत उघडकीस आली आहे. क्षुल्लक वादातून मित्रांनीच मित्राची हत्या केल्याची घटना घडली. याप्रकरणी पोलिसांनी तिघांविरोधात हत्येचा गुन्हा दाखल केला असून, तिघांनाही अटक केली आहे. आरोपींनी हत्या करुन मृतदेह कालव्यात फेकला. आकाश शर्मा असे मयत तरुणाचे नाव आहे. क्षुल्लक वादातून ही हत्या घडल्याचं पोलीस तपासात निष्पन्न झालं आहे. याप्रकरणी पोलीस अधिक तपास करत आहेत. पोलिसांनी कालव्यातून आकाशचा मृतदेह ताब्यात घेतला आहे. मृतदेह शवविच्छेदनासाठी रुग्णालयात पाठवला आहे. पोलीस आरोपींची अधिक चौकशी करत आहेत.
मित्रांसोबत दिल्लीला फिरायला गेला होता
आकाशसह चार मित्र दिल्लीहून हरिद्वार आणि ऋषिकेश फिरायला गेले होते. मात्र रस्त्यातच आकाशचे मित्रांसोबत काही कारणातून भांडण झाले. यानंतर मित्रांनी त्याची हत्या केली आणि मृतदेहाचे हात बांधून कालव्यात फेकला. हरिद्वार, ऋषिकेश फिरुन आकाशचे मित्र घरी परतले तेव्हा आकाश त्यांच्यासोबत नव्हता. घरच्यांनी आकाशबाबत विचारणा केली असता मित्रांनी उडवाउडवीची उत्तरे दिली. आकाशच्या घरच्यांना त्याच्यासोबत काही चुकीचं घडल्याची शंका आली. त्यांनी तात्काळ पोलीस ठाण्यात धाव घेत पोलिसांना याबाबत माहिती दिली.
क्षुल्लक वादातून मित्रानी संपवले
पोलिसांनी मित्रांना ताब्यात घेत चौकशी केली असता धक्कादायक माहिती उघड झाली. आकाशसोबत त्यांचा काही कारणातून वाद झाला. यातून त्याची हत्या करुन मृतदेह कालव्यात फेकल्याचे आरोपींनी पोलीत चौकशीत सांगितले. पोलिसांनी तात्काळ घटनास्थळी धाव घेत कालव्यातून आकाशचा मृतदेह बाहेर काढला. आकाशच्या डोक्याला जखम होती आणि त्याचे हात बांधले होते. पोलिसांनी पंचनामा करत मृतदेह ताब्यात घेतला. पोलीस पुढील तपास करत आहेत.
