मालेगावमध्ये चोरट्यांचा धुमाकूळ, एकाच रात्रीत पाच गावांमध्ये दरोडा
उकाड्याने लोक हैराण झाले आहेत. यामुळे ग्रामीण गावात लोक गरमीपासून बचाव करण्यासाठी छतावर झोपतात. याचाच फायदा घेत चोरट्यांनी धुमाकूळ घातला आहे.
मालेगाव : मान्सून लांबणीवर पडल्याने उकाड्याने लोक हैराण झाले आहेत. विशेषतः ग्रामीण भागात उन्हाने लाही लाही केली आहे. यामुळे ग्राणीण भागात लोक रात्री गरमीपासून बचाव करण्यासाठी घराला कुलूप लावून गच्चीवर झोपतात. याचाच फायदा चोरटे घेत आहेत. यामुळे चोरट्यांचा सुळसुळाट झाला आहे. मालेगाव तालुक्यातही कळवाडीसह पंचक्रोशीतील चोरट्यांनी धुमाकूळ घातला आहे. एकाच रात्रीत पाच गावांमध्ये दरोडे टाकल्याची घटना उघडकीस आली आहे. संशयित चोरटे सीसीटीव्हीत कैद झाले आहेत. चोरट्यांनी 16 लाखांचा मुद्देमाल लंपास केला.
सीसीटीव्हीच्या आधारे चोरट्यांचा शोध सुरु
मालेगाव तालुक्यातील माळमाथा भागातील कळवाडीसह पाडळदे, दहिवाळ, चिंचगव्हाण गावांमध्ये रात्रीच्या सुमारास पाच ते सहा जणांच्या टोळीने जबरी दरोडा टाकला. यामध्ये तब्बल 15 लाख 90 हजार 500 रुपयांचा मुदद्देमाल लंपास झाला. संशयित दरोडेखोर सीसीटीव्हीत कैद झाले असून, याप्रकरणी मालेगाव तालुका पोलीस ठाण्यात गुन्हा दाखल करण्यात आला आहे. या घटनेने संपूर्ण माळमाथा परिसरात दहशत पसरली आहे. पोलिसांनी परिसराची पाहणी केली. सीसीटीव्हीच्या आधारे पोलीस चोरट्यांचा शोध घेत आहेत.
नांदेडमध्ये कारचालकाला लुटणारी टोळी जेरबंद
कारचालकाला वाटेत अडवून त्याच्याकडील 11 लाख 64 हजार रुपये लुटणाऱ्या चौकडीला पोलिसांनी बेड्या ठोकल्या आहेत. नांदेड जिल्ह्यातील नायगाव तहसील कार्यालयासमोर 30 मे रोजी कार अडवून मुनिमला लुटण्याची घटना घडली होती. चोरट्यांनी दोन मोटार सायकल आडव्या लावून मुनिमकडील रोकड लुटली होती. या प्रकरणी चार आरोपींना पोलिसांनी अटक केली आहे. या चोरट्यांकडून 5 लाख 60 हजार रुपये हस्तगत केले आहेत. दरम्यान, यातील 1 आरोपी अल्पवयीन असल्याची माहिती अतिरिक्त पोलीस अधीक्षक अभिनास कुमार यांनी दिली.
