मॅनेजरवर जीवघेणा हल्ला करत कार पळवली, कुठे घडली घटना?
काम आटोपून रात्री घरी जायला मॅनेजर निघाले. स्वतःच्या गाडीने मॅनेजरने घरी जायला निघाले, मात्र घरापर्यंत पोहचू शकले नाही. वाटेतच त्यांच्यासोबत जे घडलं ते फार धक्कादायक होतं.
नाशिक / चंदन पुजाधिकारी : काम संपवून घरी चाललेल्या मॅनेजरवर जीवघेणा हल्ला केल्याची घटना नाशिकमध्ये उघडकीस आली आहे. मॅनेजरवर हल्ला केल्यानंतर आरोपींनी त्याची कार पळवून नेली. गंभीर जखमी मॅनेजरला एका रिक्षा चालकाने तात्काळ रुग्णालयात नेले. मात्र उपचारादरम्यान त्याचा मृत्यू झाला. या घटनेबाबत रात्री इंदिरानगर पोलीस ठाण्यात गुन्हा दाखल करण्यात आला आहे. घटनेची माहिती मिळताच पोलीस आयुक्त अंकुश शिंदे, उपायुक्त प्रशांत बच्छाव साहेब आयुक्त सोहेल शेख, वरिष्ठ पोलीस निरीक्षक संजय बांबळे यासह अधिकारी आणि कर्मचाऱ्यांनी घटनास्थळी पहाणी करत हल्लेखोरांचा शोध सुरू केला आहे.
काम आटोपून घरी जात असताना घडली घटना
पांडवलेण्याच्या पायथ्याशी असलेल्या हॉटेल आंगणजवळ ही घटना घडली. एका कंपनीत पदावर कार्यरत असलेले मॅनेजर काम आटोपून घरी चालले होते. यावेळी मॅनेजरची चारचाकी कार अडवून अज्ञात गुंडांनी त्यांच्यावर जीवघेणा हल्ला करत त्यांना गंभीर जखमी केले. त्यांनतर त्यांना उपचारार्थ रुग्णालयात दाखल करण्यात आले. मात्र या हल्ल्यात गंभीर जखमी मॅनेजरचा उपचारादरम्यान मृत्यू झाला.
जखमी मॅनेजरला तात्काळ रुग्णालयात नेले पण…
गरवारे येथील सर्विस रोडवरून पाथर्डी फाट्याकडे ही घटना घडली. मॅनेजर गंभीर जखमी होऊन रक्ताच्या थारोळ्यात पडले होते. यावेळी तेथून जाणाऱ्या एका रिक्षा चालकाने त्यांना पाथर्डी फाटा येथील एका खाजगी रुग्णालयात दाखल केले. मात्र उपचारा दरम्यान त्यांचा मृत्यू झाला. याप्रकरणी इंदिरानगर पोलीस अधिक तपास करत आहेत.
