हॉटेल मालकाला धमकावणाऱ्या गुंडाला पोलिसांनी दिला चोप, मारहाणीची घटना सीसीटीव्ही कैद
जेवणासाठी हॉटेल मालकाला चाकू दाखवणाऱ्या आरोपीला कल्याण कोळसेवाडी पोलिसांनी भर चौकात चोप देत चांगलेच बदडले आहे. हा संपूर्ण प्रकार सीसीटीव्हीत कैद झाले आहे.
कल्याण : कल्याण कोळसेवाडी सूचक नाका परिसरात गुन्हेगारी मोठ्या प्रमाणात वाढली आहे. या गुन्हेगारांमुळे हॉटेल व्यावसायिक त्रस्त झाले आहेत. यामुळे कल्याण कोळसेवाडी परिसरात गुन्हेगारांवर आळा घालण्यासाठी आता पोलीस अॅक्शन मोडवर आली आहे. जेवणासाठी हॉटेल मालकाला चाकू दाखवणाऱ्या आरोपीला कल्याण कोळसेवाडी पोलिसांनी भर चौकात चोप देत चांगलेच बदडले आहे. हा संपूर्ण प्रकार सीसीटीव्हीत कैद झाले आहे.
हॉटेल मालकाला चाकू दाखवत धिंगाणा घातला
कल्याण सूचक नाका परिसरात आलिया दरबार नावाचे हॉटेल आहे. या हॉटेलमध्ये 25 तारखेला सायंकाळी 4 वाजण्याच्या दरम्यान या परिसरातील बाबू नसीम शेख उर्फ बाबू जंगली नावाच्या गुन्हेगारांनी मोफत जेवण घेण्यासाठी हॉटेल मालकाला चाकूचा धाक दाखवत हॉटेलमध्ये मोठ्या प्रमाणात धिंगाणा घातला.
हॉटेल चालकाने आधी जेवायला घातले, मग पोलिसांना बोलावले
हॉटेल चालकांनी या गुन्हेगारांचा काटा काढण्यासाठी युक्तीचा उपयोग करत या गुन्हेगारांना मोफत जेवण दिले. आरोपी चाकू दाखवून धमकावत असल्याचे पोलिसांना सांगितले. व्यापाऱ्याची तक्रार येताच कोळसवाडी पोलिसांनी घटनास्थळी जाऊन या आरोपाची चौकशी केली.
पोलिसांनी हॉटेलबाहेरच आरोपीला चोपले
आरोपीकडून धारदार हत्यार पोलिसांनी ताब्यात घेतले. या आरोपीला धडा शिकवण्यासाठी आणि परिसरात या आरोपीची दहशत कमी करण्यासाठी पोलिसांनी हॉटेल बाहेरच या आरोपीची चांगलीच धुलाई केली.
मारहाणीची घटना सीसीटीव्हीत कैद
पोलिसाने दिलेला चोप सीसीटीव्हीत कैद झाला आहे. वारंवार पोलिसात तक्रार देऊन फक्त दिखावाची कारवाई पोलिसांकडून होत आहे. प्रत्येक वेळी हा आरोपी दोन दिवसात सुटून येऊन पुन्हा परिसरात दहशत माजवत असल्याने परिसरातील व्यापारी वर्गात भीतीचे वातावरण आहे.
या आरोपीवर कठोर कारवाई करण्याची मागणी व्यापारी वर्गाकडून केली जात आहे. सध्या पोलिसांनी या आरोपीवर हत्यार बाळगण्याचा गुन्हा दाखल करत आपला तपास सुरू केला आहे. तर याबाबत या आरोपीच्या घरच्यांकडून मीठ कमी दिल्याने वाद झाल्याचे सांगण्यात येत आहे.
