कल्याणमध्ये तलवार हल्ला थांबण्याचे नावच घेत नाही, तीन दिवसात दुसरी घटना

सुनील जाधव, TV9 मराठी, कल्याण : मुंबई-ठाण्यापासून काही अंतरावर असलेल्या कल्याण शहरात अलीकडच्या दिवसांत गुन्हेगारीच्या घटनांत मोठ्या प्रमाणावर वाढ झाली आहे. तीन दिवसांपूर्वी तलवारबाजांनी दोघांवर जीवघेणा हल्ला केला होता. ती घटना ताजी असतानाच सूचक नाका परिसरात भरदिवसा हातात तलवार घेऊन एक जण फिरत असल्याची घटना समोर आली आहे. त्यानंतर या तरुणावर चौघांनी हल्ला केला. लागोपाठ घडलेल्या या हल्ल्याच्या घटनांनी कल्याण शहरातील कायदा आणि सुव्यवस्थेचा प्रश्न ऐरणीवर आला आहे. वाढती गुन्हेगारी रोखण्यात पोलीस यंत्रणा असमर्थ ठरल्याचे चित्र आहे. पोलिसांचा धाक न राहिल्यामुळे तलवारीच्या मदतीने प्राणघातक हल्ले, गाड्यांची तोडफोड करणे हे प्रकार वाढले आहेत.

सीसीटीव्ही सोशल मीडियावर व्हायरल

तलवारबाजांनी कल्याण पूर्वेकडील परिसरात हैदोस घालून दहशत माजवली आहे. तीन दिवसांपूर्वी मध्यरात्रीच्या सुमारास नांदिवली परिसरात दोन तरुणांवर तलवारीने फिल्मी स्टाईल हल्ला करण्यात आला होता. या घटनेप्रकरणी कोळसेवाडी पोलीस ठाण्यात गुन्हा दाखल करण्यात आला आहे. पोलिसांनी तीन हल्लेखोरांना अटक करून अधिक तपास सुरु ठेवला आहे.

याचदरम्यान पुन्हा एका तरुणावर तलवारीने हल्ला झाल्यामुळे परिसरात तलवार टोळीची प्रचंड दहशत निर्माण झाली आहे. ज्या तरुणावर हल्ला झाला, तो तरुण सुरुवातीला हातातील तलवारीचा धाक दाखवून दहशत माजवण्याचा प्रयत्न करीत होता, असेही सीसीटीव्ही फुटेजमधून उघड झाले आहे. शमीम शेख उर्फ बाबू जंगली असे तरुणाचे नाव असून नंतर काही तरुणांनी त्याच्यावर तलवारीने हल्ला केला.

हे सुद्धा वाचा

मैत्रीत मिठाचा खडा का पडला ? एका क्षणात दोन मित्रांचा संसार झाला उद्ध्वस्त, नेमकं काय घडलं ?

यूपी, दिल्लीतून गाड्या चोरायचे अन् महाराष्ट्रात विकायचे, पण अखेर जाळ्यात फसलेच !

कौटुंबिक वाद टोकाला गेला, मग रक्ताच्या नात्याचाही विसर पडला !

कोळसेवाडी पोलिसांच्या हद्दीत लागोपाठ घटना

याआधी नांदिवली परिसरात दोघांवर झालेल्या तलवारीच्या हल्ल्याची घटना कोळसेवाडी पोलीस ठाण्यातच नोंद झाली होती. त्यानंतर पुन्हा सूचक नाका परिसरात तलवार टोळीने दहशत निर्माण केली. याप्रकरणी देखील कोळसेवाडी पोलीस ठाण्यात गुन्हा दाखल करण्यात आला आहे. लागोपाठ एकाच पोलीस ठाण्याच्या हद्दीत दोन घटना घडल्यामुळे पोलिसांच्या कार्यपद्धतीवर प्रश्नचिन्ह उपस्थित झाले आहेत.

सूचक नाका परिसरात हल्ल्यात जखमी झालेल्या शमीम शेखविरुद्ध अनेक गुन्हे दाखल आहेत. परिसरात त्याची प्रचंड दहशत आहे. त्याच्यावर रात्रीच्या सुमारास जुन्या वादातून तलवार आणि लोखंडी रॉडने हल्ला करण्यात आल्याचे उघड झाले आहे. दरम्यान, पोलिसांनी तलवारबाजांना रोखण्यासाठी वेळीच कठोर कारवाईची पावले उचलावीत, अशी मागणी जोर धरत आहे.