Worli Lift Crash | वरळी लिफ्ट दुर्घटना, पाच मजुरांच्या मृत्यू प्रकरणी दोघा जणांना अटक

मुंबई : वरळी लिफ्ट दुर्घटना प्रकरणी दोन आरोपींना पोलिसांनी अटक केली आहे. कंत्राटदार आणि सुपरवायझर यांच्यावर गुन्हा नोंदवून बेड्या ठोकण्यात आल्या आहेत. मुंबईतील वरळी भागात निर्माणाधीन बिल्डिंगची लिफ्ट कोसळून शनिवारी पाच मजुरांचा दुर्दैवी मृत्यू झाला होता.

वरळीतील हनुमान गल्लीत बीडीडी चाळ नंबर 118, 119 च्या समोर असलेल्या ललित अंबिका या निर्माणाधीन बिल्डिंगची लिफ्ट कोसळून चौघा मजुरांचा जागीच मृत्यू झाला होता, तर गंभीर जखमी झालेल्या एकाने उपचारादरम्यान प्राण गमावले. मृतांमध्ये अविनाश दास (35 वर्षे), भारत मंडल (27 वर्षे), चिन्मय मंडल (33 वर्षे) आणि एका 45 वर्षीय व्यक्तीचा समावेश आहे.

कंत्राटदार आणि सुपरवायझरवर गुन्हा

एनएम जोशी पोलीस ठाण्यात भादंवि कलम 304 (2) अन्वये गुन्हा दाखल करण्यात आला आहे. कंत्राटदार आणि सुपरवायझर यांच्यावर गुन्हा नोंदवून बेड्या ठोकण्यात आल्या आहेत. अटकेतील आरोपींनी कामगारांना सेफ्टी बेल्ट, हेल्मेट यासारख्या सुविधा पुरवल्या नसल्याचा ठपका ठेवण्यात आला आहे.

शनिवारी संध्याकाळी 5.45 वाजण्याच्या सुमारास ही घटना घडली होती. घटनास्थळी अग्निशमन दलाच्या जवानांनी धाव घेत मदतकार्य केले होते. जखमींना तातडीने केईएम रुग्णालय आणि नायर रुग्णालयात दाखल करण्यात आले होते.

आदित्य ठाकरेंची घटनास्थळाला भेट

वरळीचे आमदार आणि पर्यावरण मंत्री आदित्य ठाकरे यांनी घटनास्थळाला भेट दिली. ओव्हरलोडमुळे ही लिफ्ट दुर्घटना घडल्याचं प्रथमदर्शनी दिसत आहे, अशी शक्यता त्यांनी वर्तवली होती.

Maharashtra Environment Minister Aditya Thackeray reaches the site where 4 people died after a lift collapsed at an under-constructed building in Worli, Mumbai

“Prima facie, lift collapsed due to overloading. One feared to be trapped. Rescue ops underway,” says Aditya Thackeray pic.twitter.com/jRubZEwZLE

— ANI (@ANI) July 24, 2021

संबंधित बातम्या

BREAKING साताऱ्यातील मीरगावात दरड कोसळली, दहा जणांचा मृत्यू

लिफ्ट कोसळून 4 जणांचा मृत्यू, वरळीच्या हनुमान गल्लीतील धक्कादायक घटना

(Mumbai Worli Lift Crash Accident Elevator collapsed killed five workers in Building near Hanuman Galli two booked)