Nagpur Crime: अभियंता असलेल्या मुलाकडून आईची हत्या; स्वतःही केली आत्महत्या; कुजलेल्या अवस्थेत मिळाले मृतदेह

नागपूरः नागपूरच्या हिंदुस्थान कॉलनीमध्ये (Nagpur Hindustan Colney) जन्मदात्या आईचा खून (Mother Murder) करून स्वतः इंजिनिअर असलेल्या मुलाने विष पिऊन आत्महत्या (Son Suicide) केली. या घटनेमुळे परिसरात मोठी खळबळ माजली आहे. मात्र घरात दोघंच राहत असल्याने या घटनेचं नेमकं कारण अद्याप स्पष्ट झालं नाही. ज्या आईनं आपल्या मुलाला जन्म दिला त्याचं पालन पोषण केलं, ज्याला इंजिनीअर बनविल त्याच मुलाने मात्र आईवर चाकूने वार करुन हत्या केली. आणि त्यानंतर स्वतः आत्महत्या केली. ही खळबळजनक घटना नागपूरच्या हिंदुस्तान कॉलनीमध्ये घडली.

घरात आई मुलगा दोघेच

श्रीनिवास विष्णू चोपडे (वय 51) असे त्या मुलाचे नाव असून लीला विष्णू चोपडे (वय 75) असे त्याच्या आईचे नाव आहे. नागपुरातील हिंदुस्तान कॉलनीमध्ये असलेल्या या मोठ्या घरात श्रीनिवास आपल्या आईसोबत राहत होता. श्रीनिवास हा इंजिनीअर असून त्याने लग्न केलेले नव्हते, तो नोकरीसुद्धा करत नव्हता. इतक्या मोठ्या घरात दोघेच मायलेक राहत होते.

चार दिवसांपासून संपर्क नाही

गेल्या तीन-चार दिवसांपासून त्यांचा संपर्क होत नसल्यामुळे आणि मोबाईल बंद असल्यामुळे नातेवाईकांनी त्याच्या घरी धाव घेतली. त्यावेळी सर्व बाजूंनी आतमधून कुलूप लावलेले असल्यामुळे नातेवाईकांचा संशय बळावला. त्यानंतर नातेवाइकांनी धंतोली पोलीस ठाण्यात या घटनेची माहिती दिली.

पोलिसांनी दरवाजा तोडला

धंतोली पोलीस ताफ्यासह घटनास्थळी दाखल झाल्यानंतर घर आतून कुलूप बंद असल्यामुळे मुख्य दरवाजा तोडण्यात आला आहे. त्यानंतर बेडरूममध्ये पोलीस गेल्यावर जे चित्र पोलिसांना दिसल ते थरकाप उडवणार होत.

दोन्हीही मृतदेह कुजलेले

नागपूरच्या धंतोली पोलिसांनी दिलेल्या माहितीनुसार श्रीनिवास आणि त्याच्या आईचा मृतदेह हा चार ते पाच दिवस पूर्वीचा असून कुजलेल्या अवस्थेत बेडरूममध्ये आढळून आला. श्रीनिवासने आत्मघातकी पाऊल का उचलले याचा पोलीस तपास करत असून दोन्ही मृतदेह शवविच्छेदनासाठी नागपूरच्या शासकीय वैद्यकीय रुग्णालयात पाठवण्यात आले असून या घटनेमुळे परिसरात हळहळ व्यक्त केली जात आहे.