रॉंग साईडला गाडी वळवताना दुचाकी कंटेनरखाली घुसली, अपघाताचा थरार सीसीटीव्हीत कैद
विनित पोरंटला आणि पवन नामपल्ली हे दुचाकीवरुन अक्कलकोटहून सोलापूरकडे चालले होते. यावेळी सोलापूर-अक्कलकोट रोडवर एक कंटेनर राँग साईडने गाडी वळवत होता. तितक्यात भरधाव दुचाकी आली आणि कंटेनरला धडकली.
सोलापूर / सागर सुरवसे : कंटेनर चालक राँग साईडने गाडी वळवत असताना समोरुन आलेली भरधाव दुचाकी कंटेनरखाली गेल्याने झालेल्या भीषण अपघातात एका तरुणाचा मृत्यू झाला. या अपघातात एक तरुण गंभीर जखमी झाला. अपघाताचा थरार सीसीटीव्हीत कैद झाला आहे. सोलापूर-अक्कलकोट रोडवर हा अपघात घडला. विनित पोरंटला असे अपघातात मयत झालेल्या तरुणाचे नाव आहे. पवन नामपल्ली असे अपघातात जखमी झालेल्या तरुणाचे नाव आहे. याप्रकरणी वळसंग पोलीस ठाण्यात गुन्हा दाखल करण्यात आला आहे.
कंटेनर चालक राँग साईडने गाडी वळवत असताना दुचाकी धडकली
विनित पोरंटला आणि पवन नामपल्ली हे दुचाकीवरुन अक्कलकोटहून सोलापूरकडे चालले होते. यावेळी सोलापूर-अक्कलकोट रोडवर एक कंटेनर राँग साईडने गाडी वळवत होता. तितक्यात भरधाव दुचाकी आली आणि कंटेनरला धडकली. धडक झाल्यानंतर दुचाकी थेट कंटनेरखाली घुसली. या अपघातात दुचाकीवरील विनितचा जागीच मृत्यू झाला तर पवन गंभीर जखमी झाला.
घटना सीसीटीव्हीत कैद
अक्कलकोट रोडवरील मल्लिकार्जुननगर जवळील टाटा शोरूम समोर ही घटना घडली. ही सर्व घटना तेथील सीसीटीव्हीत कैद झाली आहे. याबाबत वळसंग पोलीस ठाण्यात गुन्हा दाखल करण्यात आला आहे. पोलीस घटनेचा अधिक तपास करत आहेत. भादवी कलम 304, 287, 337, 338 या कलमांतर्गत गुन्हा दाखल झाला आहे. आरोपी कंटेनर चालक फरार आहे. पोलीस त्याचा शोध घेत आहेत, असे वळसंग पोलीस स्टेशनचे सहाय्यक पोलीस निरीक्षक अनिल सनगल्ले यांनी सांगितले.
भंडाऱ्यात ट्रॅक्टर नदीत कोसळून एक ठार
शेतमाल घेऊन जाणारा ट्रॅक्टर 30 फूट खाली नदीत कोसळून झालेल्या अपघातात ट्रॅक्टरवरील एकजण जागीच ठार झाला. अन्य दोन गंभीर जखमी झाले. भंडारा जिल्ह्याच्या लाखांदूर येथे पवनी-लाखांदूर मार्गावरील शिव मंदिरजवळील पुलावर हा अपघात घडला. अण्णा पारधी असे मयत व्यक्तीचे नाव आहे. राष्ट्रपाल ठाकरे आणि राधेश्याम ढोरे अशी अपघातात जखमी झालेल्यांची नावे आहेत.
