इन्स्टाग्रामवर मैत्री, मग प्रेमाच्या आणाभाका, प्रेयसीला भेटायला गेला तो परतलाच नाही !
इन्स्टाग्रामवर प्रेमाच्या आणाभाका घेतल्या. मग भेटायचं ठरलं. रात्रीपर्यंत घरी येतो सांगून तरुण इन्स्टावरील प्रेयसीला भेटायला निघून गेला. मात्र त्यानंतर परतलाच नाही.
पटना : लहानांपासून मोठ्यांपर्यंत सर्वांनाच सोशल मीडियाचं वेड लागलं आहे. सतत सोशल मीडियावर अॅक्टिव्ह रहायचं हा रोजच्या दिनचर्येचा भाग बनला आहे. सोशल मीडियावर नाती जोडली जातात आणि फसवणुकाही होतात. अशीच एक धक्कादायक घटना पटनात उघडकीस आली आहे. इन्स्टाग्रामवर गयाच्या तरुणाची पटनामधील तरुणीशी ओळख झाली. दोघांमध्ये आधी मैत्री झाली, मग प्रेमसंबंध जुळले. मग दररोज दोघांमध्ये चॅटिंग सुरु होते. शुक्रवारी दोघांनी भेटण्याचे ठरवले. त्याप्रमाणे तरुण गयाहून पटनाला तरुणीला भेटायला आला. मात्र त्यानंतर तो घरी परतलाच नाही. सायंकाळी त्याच्या घरच्यांना थेट 50 लाखाच्या खंडणीची मागणी करण्यासाठी फोन आला. त्यानंतर सदर फोनही बंद झाला.
इन्स्टाग्रामवर ओळख, मग प्रेम
गया येथील ऋषभ चौधरी या 15 वर्षीय तरुणाची पटना येथील मुलीशी इन्स्टाग्रामवर ओळख झाली. मग दोघांचे प्रेमसंबंध जुळले. काही दिवस इन्स्टावर चॅटिंग केल्यानंतर दोघांनी भेटायचे ठरवले. त्यानुसार शुक्रवारी तरुण संध्याकाळपर्यंत परत येतो सांगून गयाहून मुलीला भेटण्यासाठी पटनाला गेला. त्याच्यासोबत त्याचे मित्रही होते. पटनाजवळील संपतचकजवळ पोहचताच त्याचा मोबाईल बंद झाला.
प्रेयसीला भेटायला गेला तो परतलाच नाही
तरुणाच्या मित्रांनी दिलेल्या माहितीनुसार, ऋषभ संपतचकमध्ये इन्स्टाग्रामवरील प्रेयसीला भेटला. मग दोघे बाईकवरुन कुठेतरी निघून गेले. त्यानंतर तरुणाशी काहीही संपर्क होऊ शकला नाही. यानंतर दुसऱ्या दिवशी शनिवारी ऋषभच्या घरच्यांना एक फोन आला आणि फोनवर 50 लाख रुपयांची मागणी करण्यात आली. मात्र घरच्यांनी पैसे कुठे द्यायचे विचारताच फोन बंद झाला. त्यानंतर तो फोन सतत बंद येत होता.
यानंतर ऋषभच्या घरच्यांनी बेलागंज पोलीस ठाण्यात धाव घेत सर्व प्रकार सांगितला. पोलिसांनी घटनेचा तपास सुरु केला असून, मोबाईलचे लोकेशन ट्रेस करत आहेत. प्रेमप्रकरणातून हा प्रकार घडला असावा, असा अंदाज पोलिसांनी व्यक्त केला आहे. पोलीस प्रकरणाचा वेगाने तपास करत आहेत. तपासाअंती सर्व सत्य उघड होईल.
