Jalgaon Crime : भररस्त्यात तरुणाला भोसकले, शाळेसमोरच घडलेल्या घटनेने नागरिकही हादरले !
रविवारी संध्याकाळी 7 वाजण्याच्या सुमारास मयत तरुण चाळीसगाव शहरातील पोद्दार शाळेजवळून चालला होता. याच दरम्यान काही अज्ञात आरोपी आले आणि तरुणावर जीवघेणा हल्ला करत पळून गेले.
चाळीसगाव : मकरसंक्रातीच्या सणाला गालबोट लावणारी घटना चाळीसगाव शहरात उघडकीस आली आहे. अज्ञात कारणावरुन अनोळखी व्यक्तींनी एका 35 वर्षीय तरुणाची भररस्त्यात चाकूने भोसकून हत्या केल्याची घटना घडली आहे. या घटनेमुळे शहरात एकच खळबळ उडाली आहे. दिनेश जाधव असे हत्या करण्यात आलेल्या तरुणाचे नाव असून, तो चाळीसगावमधील पवारवाडी येथील रहिवासी आहे. याप्रकरणी चाळीसगाव शहर पोलीस ठाण्यात अज्ञात आरोपींविरोधात हत्येचा गुन्हा दाखल दाखल करण्यात आला आहे. पोलीस अज्ञात आरोपींचा शोध घेत आहेत. आरोपींना अटक झाल्यानंतरच हत्येचे कारण उलगडेल.
मकरसंक्रातीच्या दिवशीच घडली घटना
रविवारी संध्याकाळी 7 वाजण्याच्या सुमारास मयत तरुण चाळीसगाव शहरातील पोद्दार शाळेजवळून चालला होता. याच दरम्यान काही अज्ञात आरोपी आले आणि तरुणावर जीवघेणा हल्ला करत पळून गेले. या हल्ल्यात तरुणाचा जागीच मृत्यू झाला.
पोलिसांनी पंचनामा करत मृतदेह ताब्यात घेतला
नागरिकांनी चाळीसगाव शहर पोलिसांना घटनेची माहिती दिली. माहिती मिळताच पोलिसांनी घटनास्थळी दाखल होत घटनेचा पंचनामा केला. मृतदेह ताब्यात घेत शवविच्छेदनासाठी रुग्णालयात पाठवला.
चाळीसगाव शहर पोलिसात हत्येचा गुन्हा दाखल
चाळीसगाव शहर पोलिसांनी हत्येचा गुन्हा दाखल करत पुढील कारवाई सुरु केली आहे. तरुणाला नेमके कुणी मारले? कोणत्या कारणातून त्याची हत्या केली? याबाबत अद्याप कळू शकले नाही. आरोपींच्या अटकेनंतरच सर्व प्रकार उघडकीस येईल. पोलीस प्रकरणाचा कसून तपास करत आहेत.
नागरिकांमध्ये भीतीचे वातावरण
मात्र या घटनेने संपूर्ण तालुका हादरला असून, परिसरात भितीचे वातावरण निर्माण झाले आहे. तत्पूर्वी एकीकडे मकर संक्रांतीचा सण उत्साहात साजरा करण्यात येत असताना ह्या घटनेने एकच खळबळ उडाली आहे. पोलीस प्रशासन कार्यतत्परतेने प्रत्येक हालचालीवर लक्ष ठेवून आहेत.
