गॅस कटरने मशीन कापलं, लुटले लाखो रुपये… नंतर ATM ला थेट आगच लावली, चोरांच्या कृत्याने हादरलं शहर
एटीएम गॅस कटरने कापून चोरट्यांनी 34 लाख रुपयांचा ऐवज लंपास केला. यानंतर मशीनला आग लावली. ही घटना सीसीटीव्हीमध्ये कैद झाली आहे. पोलिसांनी गुन्हा दाखल करून आरोपींचा शोध सुरू केला.
मुंबई | 6 नोव्हेंबर 2023 : एखादी चोरी करण्यासाठी चोरट्यांनी वेगवेगळ्या क्लुप्त्या लढवल्याचे तुम्ही ऐकले असेल. पण मुझफ्फरपूरमध्ये मात्र चोरट्यांनी हद्दच पार केली. त्यांनी एक एटीएम मशीन कापण्यासाठी थेट गॅस कटरचा वापर केला. आणि 34 लाख 71 हजार रुपयांचा ऐवज लंपास केला. पण पैसे लुटल्यावरही त्यांचं समाधान झालं नाही. त्यांनी थेट त्या एटीएम मशीनलच आग लावून टाकली. ही संपूर्ण घटना सीसीटीव्हीमध्ये कैद झाली आहे. याप्रकरणी पोलिसांनी गुन्हा दाखल करून आरोपींचा शोध सुरू केला आहे.
खरंतर हे प्रकरण अहियापूर पोलीस ठाण्याच्या हद्दीतील बाजार समिती येथील आहे. अहियापूर पोलीस ठाण्याच्या हद्दीत दरभंगा रोडवरील बाजार समितीजवळ एसबीआयचे एटीएम आहे. ४ नोव्हेंबरला पहाटे चोरट्यांनी एटीएमवर हल्ला केला. पहिले तर आत घुसताच त्या चोरट्यांनी एटीएम रूममध्ये लावलेल्या सीसीटीव्हीचे नुकसान केले, त्यामुळे त्यांचे चेहरे रेकॉर्ड होऊ शकले नाहीत.
पैसे लुटले आणि एटीएमला लावली आग
त्यानंतर त्यांनी गॅस कटरने एटीएम मशीन कापून 34 लाख 71 हजार रुपयांची रोख रक्कम लंपास केली. पण तेवढ्यावरही त्या चोरट्यांचं समाधान झाले नाही. पैसे लुटल्यानंतर त्यांनी एमटीएम मशीनला आग लावली आणि घटनास्थळावरून पळ काढला. या चोरीच्या घटनेची आणि आगीची माहिती मिळताच पोलीस घटनास्थळी दाखल झाले. अग्निशमन दलाच्या जवानांना बोलावून आगही आटोक्यात आणण्यात आली. एटीएमची देखभाल करणाऱ्या कंपनीचे वकील श्याम सुंदर कुमार यांनी या घटनेबाबत पोलिस ठाण्यात लेखी तक्रार दिली आहे.
दोन चोर आतमध्ये तर इतर होते बाहेर
याप्रकरणी एसएचओ रोहन कुमार यांनी सांगितले की, बाजार समितीसमोर एक एटीएम आहे. तेथे ४ नोव्हेंबर, शनिवारी रात्री उशिरा काही चोर आले आणि त्यांनी गॅस कटर मशिनने एटीएम कापून लाखो रुपये लंपास केले. पोलिसांनी घटनास्थळावरून गॅस कटर, मशिन पाईप आणि इतर साहित्य जप्त केले आहे. पोलिसांनी एटीएम रूममध्ये लावण्यात आलेले सीसीटीव्ही फुटेज ताब्यात घेतले असून त्यामध्ये दोन लोक आत शिरताना दिसत आहेत. तर एटीएमच्या बाहेर काही लोकं दिसत होते. हल्लेखोरांची ओळख पटवली जात असून त्यांना पकडण्यासाठी पोलिसांची अनेक पथके तयार करण्यात आली आहेत. याप्रकरणी पुढील तपास सुरू आहे.
