तिला कपडे बदलताना पाहिलं, दुसरीने टेलरला बेदम चोपलं, व्हिडीओ व्हायरल

महिलांवरील अत्याचाराच्या घटनांमध्ये वाढ झाल्यानंतर प्रशासनाला प्रश्न विचारण्यात येतात. मात्र उल्हासनगरमध्ये एका महिलेने असे कृत्य करण्याचा प्रयत्न करणाऱ्या इसमाला चांगलाच धडा शिकवला. शहरात एका महिलेने टेलरला बेदम मारहाण करत त्याला चोप दिला. या टेलरने एका दुसऱ्या महिलेला कपडे बदलाताना पाहिल्याचा आरोप करण्यात आला होता. मात्र त्या महिलेऐवजी दुसऱ्या महिलेनेच त्याला चोप दिला. या संपूर्ण मारहाणीचा व्हिडीओ मोबाईलमध्ये कैद झाला असून तो व्हिडीओ चांगलाच व्हायरल झाला आहे. दरम्यान पोलसांनी मारहाण करणाऱ्या त्या महिलेवर गुन्हा दाखल केला आहे.

भररस्त्यात मारहाण 

मिळालेल्या माहितीनुसार, उल्हासनगरधील स्टेशन रोड परिसरात सोमवारी संध्याकाळच्या सुमारास ही घटना घडली. त्या परिसरात एक महिला कपडे खरेदी करण्यासाठी आलेली असताना तिथल्याच एका टेलरने तिला कपडे बदलताना पाहिलं, असा आरोप त्या महिलेने केला. मात्र त्या महिलेने त्यावर काहीच ॲक्शन घेतली नाही, उलट तिच्याऐवजी एका दुसऱ्याच महिलेने त्या टेलरला पकडून त्याला बेदम मारहाण करण्यास सुरूवात केली, शिव्याही दिल्या. या  मारहाणीची , गोंधळाची बातमी समजताच पोलीस तिथे दाखल झाले. मात्र त्यांच्यासमोरही त्या महिलेची त्या टेलरला मारहाण सुरूच होती.

अखेर पोलिसांनी त्या महिलेला थांबवले आणि त्या टेलरला ताब्यात घेतलं. याबाबत मूळ पीडित महिलेने अद्याप पोलीस ठाण्यात कोणतीही तक्रार केलेली नसून टेलर जखमी झाल्याने त्याला रुग्णालयात उपचारांसाठी दाखल करण्यात आलं आहे. त्याच्या तक्रारीवरून मारहाण करणाऱ्या महिलेविरोधात मारहाणीचा गुन्हा दाखल करण्यात आला आहे, अशी माहिती पोलिसांनी दिली आहे. तर मूळ पीडित महिलेला तक्रार देण्यासाठी बोलावण्यात आलं असून तिच्याकडून योग्य प्रतिसाद मिळत नसल्याचंही पोलिसांचं म्हणणं आहे. या मारहाणीचा व्हिडिओ सोशल मीडियावर व्हायरल झाला आहे.