जबरी चोरी करणाऱ्यांना सापळा लावून अटक, 51 हजारांचा मुद्देमाल जप्त

आरोपींकडून मोबाईल हॅण्डसेट आणि बजाज बॉक्सर मोटार सायकल असा एकूण 51 हजार रुपये किंमतीचा मुद्देमाल हस्तगत करण्यात आला आहे

Nupur Chilkulwar | Updated on: Nov 25, 2020 | 6:05 PM

कोल्हापूर : इचलकरंजी शहरामध्ये परप्रांतीय कामगारांचे मोबाईल जबरीने चोरी करणाऱ्या (Two Thief Arrested) दोन गुन्हेगारांना स्थानिक गुन्हे शाखा इचलकरंजी पथकाने मुद्देमालासह अटक केली. दरम्यान, आरोपींकडून मोबाईल हॅण्डसेट आणि बजाज बॉक्सर मोटार सायकल असा एकूण 51 हजार रुपये किंमतीचा मुद्देमाल हस्तगत करण्यात आला आहे (Two Thief Arrested).

इचलकरंजी ते चंदूरला जोडणाऱ्या रोडवर तात्यासाहेब अशोक पाटील (चंदूर) हे कामावर जात असातना दोन अनोळखी इसम मोटर सायकलवरुन पाटील यांच्या पाठीमागून आले. त्यांना धक्काबुक्की करुन हातातील मोबाईल आणि रोख रक्कम असा एकूण 5 हजार 500 रुपये किंमतीचा माल जबरदस्तीने हिसकावून चोरुन नेला. त्यानंतर तात्यासाहेब पाटील यांनी पोलिसांत धाव घेतली. त्यांनी शिवाजीनगर पोलीस ठाण्यात तक्रार दाखल केली.

त्यानुसार, या चोरीची गंभीर दखल घेत पोलिसांनी तपासाला सुरुवात केली. त्या अनुषंगाने स्थानिक गुन्हे शाखा इचलकरंजी यांच्या पथकाला मिळालेल्या गोपनीय माहितीनुसार सापळा रचण्यात आला. यावेळी चंदूर ओढ्यावरील पुलावरुन गजानन रामचंद्र पटवेगार (वय 21) आणि मुदकाप्पा येलगुरप्पा मुलीमणी (वय 23) या दोघांना ताब्यात घेण्यात आले.

दरम्यान, त्यांच्याकडून गुन्ह्यात चोरीला गेलेला मोबाईल हॅण्डसेट आणि बजाज बॉक्सर मोटार सायकल असा एकूण 51 हजार रुपये किंमतीचा मुद्देमाल हस्तगत करण्यात आला आहे. ही कारवाई स्थानिक गुन्हे शाखेचे सहाय्यक पोलीस निरीक्षक विकास जाधव यांच्यासह आयुब गडकरी, प्रशांत कांबळे, रणजित पाटील, अमर शिरढोणे,राजू कांबळे, यशवंत कुंभार तसेच सायबर विभागाकडील सचिन बेंडखळे यांनी केली.

इंदापुरात चोरट्यांचा एका रात्रीत सात दुकानांवर डल्ला, लाखाचा ऐवज लंपास, चोरीचा प्रकार सीसीटीव्हीत कैदhttps://t.co/K04r98Ajt9 #indapur

— TV9 Marathi (@TV9Marathi) November 25, 2020