रवी खरात, टीव्ही9 प्रतिनिधी, अलिबाग | 28 फेब्रुवारी 2024 : अलिबागचे मनमोहक सागरी किनारे, निसर्ग सौंदर्याची मोहिनी कुणाला न पडावी तर नवलच…! बॉलिवूडचा आघाडीचा अभिनेता रणवीर सिंग हा प्रचंड लोकप्रिय आहे. रणवीरलाही अलिबागची चांगलीच भुरळ पडली आहे. रणवीर सिंगने नुकतंच अलिबागमध्ये येऊन आपल्या चाहत्यांना सुखद धक्का दिला. अलिबागचे माजी आमदार स्वर्गीय मधुकर ठाकूर यांच्या सातीर्जे येथील निवासस्थनी रणवीर सिंग याने सदिच्छा भेट दिली. यावेळी त्याने गावातील तरुणांसोबत क्रिकेट खेळण्याचा आनंद लुटला. रणवीरचे आगमन होताच ठाकूर कुटुंबियांकडून त्याचे जल्लोषात स्वागत करण्यात आले. प्राची ठाकूर आणि कटुंबातील महिलांनी त्याचे औक्षण केले.
यावेळी स्व. मधुकर ठाकूर यांचे चिरंजीव तथा रायगड जिल्हा काँग्रेसचे वरिष्ठ उपाध्यक्ष राजाभाऊ ठाकूर, त्यांचे मोठे बंधू रवी उर्फ नाना ठाकूर, मालती ठाकूर, मीनाक्षी ठाकूर, कळल ठाकूर आणि ठाकूर परिवारातील सर्व सदस्य उपस्थित होते.
सर्वांत मिळून-मिसळून वावरला रणवीर
बॉलिवूडमधील एक आघाडीचा अभिनेता असूनही रणवीर सिंगचं वागणं अगदी साधं असत. चित्रविचित्र कपडे, फॅशन सेन्स यामुळे रणवीर कितीही चर्चेत असता, तरी त्याचे पाय नेहमीच जमीनीवर असतात. तो नेहमी सर्वसामान्यांमध्ये मिळू-मिसळू वागतो. त्याचं हेच स्वभव वैशिष्ट्य अलिबागकरांनाही भावलं. राजाभाऊ ठाकूर यांचे थोरले बंधू ॲड. प्रवीण ठाकूर यांची मुलगी धनश्री ठाकूर हिच्या वाढदिवसानिमित्ताने यावेळी केक कापण्यात आला. त्या आनंदातही रणवीर सिंग सहभागी झाला. एक आघाडीचा अभिनेता असूनही त्याचे वावरणे हे सर्वांना आपलेसे करणारे होते.
तरूणांसोबत लुटला क्रिकेटचा आनंद
सर्वांबरोबर हास्य विनोदात काही क्षण रमल्यानंतर रणवीरला क्रिकेट खेळण्याचा मोह आवरता आला नाही. गावातील मुलांसोबत त्याने क्रिकेट खेळण्याचा आनंद लुटला. यावेळी त्याने उत्तम फलंदाजी केली. अभिनयासोबत तो चांगला क्रिकेट खेळतो, हेदेखील त्याने दाखवून दिले. रणवीर सिंग नेहमीच अलिबागला येत असतो. अलिबाग तालुक्यातील मापगाव येथे रणवीर सिंग आणि दीपिका पदुकोण या फेमस जोडीने ९० गुंठे जागा २२ कोटी रुपयांना खरेदी केली आहे. रणवीर आणि दीपिकाच्या या जागेत २ बंगले असून नारळ, सुपारीची मोठी बाग देखील आहे.