Sunil Grover: सुनील ग्रोवरला काय झालं? कडाक्याच्या थंडीत रस्त्यावर विकतोय दूध
कॉमेडियन सुनील ग्रोवरवर आली दूध विकण्याची वेळ? फोटो पाहून चाहते अवाक्!
नवी दिल्ली: कॉमेडियन सुनील ग्रोवर सध्या कोणत्याच कॉमेडी शोमध्ये सहभागी नाही, मात्र चाहत्यांचं मनोरंजन कसं करावं हे त्याला बरोबर ठाऊक आहे. सोशल मीडियावर तो विविध फोटो आणि व्हिडीओ पोस्ट करून चाहत्यांच्या संपर्कात असतो. त्याचे हे फोटो पाहून कधी नेटकऱ्यांना हसू अनावर होतं, तर कधी ते आश्चर्यचकीत होतात. सुनीलने इन्स्टाग्रामवर पोस्ट केलेला नवीन फोटो पाहून चाहते पुन्हा एकदा अवाक् झाले आहेत.
इन्स्टाग्रामवरील या फोटोमध्ये सुनील एका बाईकवर बसून दूध विकताना पहायला मिळतोय. त्याच्या बाईकला दोन्ही बाजूंनी दुधाचे कंटेनर बांधलेले दिसत आहेत. कडाक्याच्या थंडीत त्याने जॅकेट, स्वेटर आणि डोक्यावर टोपी घातली आहे. सुनीलला रस्त्यावर दूध विकताना पाहून चाहत्यांना धक्का बसला आहे.
सुनीलच्या या फोटोवर काही मजेशीर प्रतिक्रियासुद्धा येत आहेत. ‘दूध मांगोगे तो खीर देंगे.. दूध फट गया तो पनीर देंगे’, असं अभिनेत्री चारू मलिकने मस्करीत लिहिलं आहे. तर ‘दुधात पाणी किती मिसळलंस’ असा मजेशीर सवाल दुसऱ्या युजरने केला.
सुनीलला ‘द कपिल शर्मा शो’मधून बरीच लोकप्रियता मिळाली. सुनीलच्या कॉमिक टायमिंगचं प्रेक्षकांकडून कौतुक केलं जातं. कॉमेडीशिवाय त्याने चित्रपटांमध्येही काम केलं आहे. काही दिवसांपूर्वी प्रदर्शित झालेल्या ‘गुडबाय’ या चित्रपटात त्याने भूमिका साकारली होती. ‘तांडव’ या वेब सीरिजमध्येही तो झळकला होता.
काही दिवसांपूर्वी सुनीलचा रस्त्यावर शेंगदाणे विकतानाचाही व्हिडीओ व्हायरल झाला होता. रस्त्याच्या कडेला त्याला शेंगदाणे विकताना पाहिल्यानंतर अनेकांनी त्याच्याविषयी काळजी व्यक्त केली होती. सुनीलवर अशी वेळ का आली, असा सवाल चाहत्यांनी केला होता. कपिल शर्माशी वाद झाल्यानंतर त्याच्यावर शेंगदाणे विकण्याची वेळ आली, असंही काहींनी म्हटलं होतं.
