प्रसिद्ध टीव्ही अभिनेता स्टेज 4 कॅन्सरने ग्रस्त; उपचारासाठी नाहीत पैसे, सेलिब्रिटींनी चाहत्यांकडे मागितली मदत
या पोस्टवर चाहत्यांनी आणि टीव्ही इंडस्ट्रीतल्या सहकलाकारांनी कमेंट करत काळजी व्यक्त केली होती. यादरम्यान आता टेलिव्हिजन इंडस्ट्रीतल्या बऱ्याच सेलिब्रिटींनी वैभवच्या उपचारासाठी मदतीचं आवाहन केलं आहे.
मुंबई: ‘निशा और उसके कझिन्स’ या मालिकेत भूमिका साकारलेला अभिनेता वैभव राघवे स्टेज-4 कॅन्सरने ग्रस्त आहे. गेल्या वर्षी खुद्द वैभवने सोशल मीडियाद्वारे चाहत्यांना याबद्दलची माहिती दिली होती. वैभवने रुग्णालयातून एक व्हिडीओ शेअर केला होता, ज्यामध्ये कॅन्सरविषयी बोलताना तो अत्यंत भावूक झाला होता. या पोस्टवर चाहत्यांनी आणि टीव्ही इंडस्ट्रीतल्या सहकलाकारांनी कमेंट करत काळजी व्यक्त केली होती. यादरम्यान आता टेलिव्हिजन इंडस्ट्रीतल्या बऱ्याच सेलिब्रिटींनी वैभवच्या उपचारासाठी मदतीचं आवाहन केलं आहे.
वैभव राघवेचा मित्र आणि अभिनेता मोहित मलिक आणि अदिती मलिक यांनी उपचारासाठी पैसे गोळा करण्यास सुरुवात केली आहे. यासाठी त्यांनी सोशल मीडियावर एक पोस्ट लिहिली आहे. ‘नमस्कार मित्रांनो.. आम्ही आमचा मित्र वैभव कुमार सिंह राघवे (विभू राघवे) याच्या उपचारासाठी पैसे गोळा करण्याचा प्रयत्न करत आहोत. एका दुर्मिळ प्रकारच्या कोलन कॅन्सरने तो ग्रस्त आहे. गेल्या वर्षी आम्हाला जेव्हा याविषयी समजलं, तेव्हा आम्ही पूर्णपणे खचलो होतो. आमच्यासाठी हे खूप धक्कादायक होतं. मात्र आपण एकत्र येऊन त्याची मदत केली तर त्याच्यासाठी हा प्रवास सोपा करू शकतो’, असं मोहितने लिहिलंय.
अदिती आणि मोहन यांनी पुढे लिहिलं, ‘गेल्या वर्षी उपचारादरम्यान त्याने चांगला प्रतिसाद दिला होता. मात्र त्याला अधिक उपचाराची गरज आहे. आतापर्यंत जमवलेला फंड सगळा संपला आहे. मुंबईच्या टाटा मेमोरियल रुग्णालयात त्याच्यावर उपचार सुरू आहेत. त्याच्या एका इम्युनोथेरेपीची किंमत साडेचार लाख रुपये आहे. त्याच्या उपचारासाठी मोठ्या रकमेची गरज आहे. आम्ही आमच्या बाजूने बरेच प्रयत्न करत आहोत. मात्र तुमचीही मदत मिळाली तर तो बरा होऊ शकतो. तुम्हाला जेवढं शक्य होईल, तेवढी मदत करा.’
अदिती आणि मोहितशिवाय मोहसिन खान, करणवीर बोहरा आणि सिंपल कौल यांनीसुद्धा त्यांच्या इन्स्टाग्राम अकाऊंटवर पोस्ट शेअर करत आर्थिक मदतीचं आवाहन केलं आहे.
वैभव राघवेनं ‘रिधम’ आणि ‘सुवरिन गुग्गल- टॉपर ऑफ द इअर’ या मालिकांमध्येही महत्त्वपूर्ण भूमिका साकारल्या होत्या. ‘निशा और उसके कझिन्स’ या मालिकेतून त्याला घराघरात प्रसिद्धी मिळाली. या मालिकेत त्याने अनेरी वजनी आणि मोहसिन खान यांच्यासोबत काम केलं होतं.
