कपडे धुतल्याने तुमचे हात कोरडे होतात का ? या उपायांनी हात बनवा कोमल

Tips to make dry hands soft: बहुतांश लोक वैयक्तिक स्वच्छता राखण्यासाठी स्वच्छ- साफ कपड्यांना प्राधान्य देतात. यामुळे कपडे स्वच्छ ठेवणं हा प्रत्येकाच्या दैनंदिन जीवनाचा एक महत्वाचा भाग ठरतो. मात्र रोज कपडे धुण्याचे काही तोटेही असतात. रोज कपडे धुताना वापरलेल्या साबणामुळे आपले हात कोरडे (dry hands) होतात आणि काही वेळेस त्यांना भेगाही पडतात. अशा परिस्थितीत काही साध्या – सोप्या उपायांनी तुम्ही तुमचे हात पुन्हा मऊ आणि कोमल बनवू (soft hands and skin) शकता. कपडे चांगले स्वच्छ निघावेत, म्हणून लोक बऱ्याच वेळेस महागड्या डिटर्जंट पावडरीचा आणि साबणाचा उपयोग करतात. परंतु या उत्पादनांमध्ये असणारी केमिकल्स हातातील नैसर्गिक ओलावा काढून टाकतात. यामुळे हाताची त्वचा कोरडी आणि फाटलेली दिसते. अशावेळी हातांच्या विशेष काळजीसाठी (hand care) काही नैसर्गिक गोष्टींचा (home remedies) वापर करणं तुमच्यासाठी उत्तम ठरू शकतं. हात सुंदर आणि मऊ करण्यासाठी काही टिप्स जाणून घ्या.

कोमट पाण्याने हात धुवावे –

कोरड्या व भेगा पडलेल्या हातांसाठी कोमट पाण्याचा वापर करणे चांगले. गार पाण्यामुळे हाताचा ओलावा कमी होतो. मात्र कोमट पाण्यामुळे हाताची त्वचा मऊ होते. यासाठी हात काही वेळ कोमट पाण्यात बुडवून ठेवावेत. नंतर हात स्वच्छ कापडाने नीट पुसून कोरडे करा व त्यानंतर हातांना क्रीम किंवा लोशन लावा.

मॉइश्चरायजर वापरा –

हातांचा कोरडेपणा कमी करण्यासाठी एखादे लोशन किंवा मॉइश्चरायजरचा वापर करणे हा चांगला उपाय आहे. यासाठी रोज रात्री झोपण्यापूर्वी हात पाण्याने स्वच्छ धुवा व नीट कोरडे करा. नंतर हातांवर क्रीम, लोशन किंवा साय लावून नीट चोळावे. यामुळे तुमचे हात मऊ होतील.

मधाचा वापर करा –

हातांना मॉइश्चरायझ करण्यासाठी तुम्ही मधदेखील वापरू शकता. यासाठी हातावर मध लावा त्यानंतर 15 मिनिटांनी स्वच्छ पाण्याने हात धुवा. यामुळे हात पूर्वीपेक्षा मऊ आणि गुळगुळीत झाल्याचे दिसून येईल.

कोरफडीचा रस लावा –

हातांच्या भेगा कमी करण्यासाठी व त्यांचा ओलावा कायम टिकवून ठेवण्यासाठी कोरफडीचा रस किंवा कोरफड जेल वापरणेही उपयुक्त ठरेल. अशावेळी हातावर कोरफड जेल लावून हलक्या हाताने मसाज करावा. यामुळे तुमच्या हातांच्या भेगा दूर होतील आणि तुमचे हात मऊ होतील.

दुधाच्या वापराने हात होतील मऊ –

हाताी त्वचा मऊ ठेवण्यासाठी दुधाचा वापर हाही प्रभावी ठरू शकेल. दुधात असलेले मॉइश्चरायझिंग घटक हातांना मुलायम बनविण्यासाठी साहाय्यक ठरतात . त्यासाठी कोमट दुधात हात बुडवून ठेवा. नंतर १० मिनिटांनी स्वच्छ पाण्याने हात धुवा.