विधानपरिषदेच्या 11 जागांसाठी 12 उमेदवार, कोणाचा उमेदवार पडणार?

विधान परिषदेच्या निवडणुकीसाठी भाजपनं 5 उमेदवारांची यादी जाहीर केलीये. त्यात पंकजा मुंडेंना उमेदवारी देण्यात आली आहे. त्यामुळं त्यांची आमदारकी निश्चित झाली. मात्र महाविकास आघाडीनं 3 उमेदवार दिल्यानं आता 1 उमेदवार कोणाचा पडणार ? याकडे नजरा आहेत.

महायुतीच्या वाट्याला 9 जागा येत असून भाजपच्या कोट्यातून सर्व पाचही उमेदवार भाजपनं जाहीर केले. ज्यात पंकजा मुंडेंचं नाव पहिलं आहे. पंकजा मुंडे, परिणय फुके, योगेश टिळेकर, अमित गोरखे आणि सदाभाऊ खोत यांना पुन्हा एकदा भाजपनं आपल्या कोट्यातून संधी दिलीये. विशेष म्हणजेच पंकजा मुंडेंच्याच नावाकडे नजरा होत्या आणि पंकजांना विधान परिषदेवर आमदारकीची संधी देवून राजकीय वनवास संपवलाय.

नुकत्याच झालेल्या लोकसभा निवडणुकीत बीडमध्ये प्रितम मुंडेंचं तिकीट कापून पंकजा मुंडे यांना मैदानात उतरवलं होतं. पण पंकजा यांचं लोकसभेतही शरद पवार गटाच्या बजरंग सोनावणेंनी पराभव केला. मात्र आता त्यांचा विधान परिषदेवर आमदारकीचा मार्ग मोकळा झालाय.

शिंदेंची शिवसेना आणि अजित पवारांच्या राष्ट्रवादीकडूनही 2-2 उमेदवार दिले जाणार आहेत. सूत्रांकडून मिळालेल्या माहितीनुसार, शिंदेंच्या शिवसेनेकडून निलम गोऱ्हे आणि भावना गवळींना संधी मिळेल हे निश्चित झालं आहे. तर अजित पवारांच्या राष्ट्रवादीकडून राजेश विटेकर आणि शिवाजीराव गर्जे यांचं नाव निश्चित झाल्याची माहिती आहे. शिवाजीराव गर्जेंच्या नावावरुन रोहित पवारांनी जोरदार टीका केलीये.

महाविकास आघाडीचा विचार केला तर शरद पवारांची राष्ट्रवादी शेकापच्या जयंत पाटलांना पाठिंबा देणार आहे. ठाकरेंच्या शिवसेनेकडून मिलिंद नार्वेकर आणि काँग्रेसनं प्रज्ञा सातवांना उमेदवारी दिली आहे.

विधानसभेच्या आमदारांच्या संख्याबळावर 11 जागेसाठी 12 उमेदवार झालेत. त्यामुळं निवडणूक होणार हे निश्चित. आता कोणाचा उमेदवार पडणार हे पाहावं लागेल.