Nanded Terrorist Connetion| दहशतवादी कनेक्शनमुळे नांदेड पोलिसांची झोप उडाली, रिंधाच्या साथीदारांवर धाडी, घराची झाडा-झडती
हरियाणा राज्यातील कर्नाल जिल्ह्यात पकडण्यात आलेल्या चार दहशतवाद्यांकडून विस्फोटक पदार्थ आणि अनेक हत्यारं, दारु गोळा जप्त करण्यात आलाआहे.
नांदेडः हरियाणा पोलिसांनी (Hariyana Police) गुरुवारी पकडलेल्या चार दहशतवाद्यांचे नांदेड कनेक्शन उघड झाल्याने नांदेड पोलीस सतर्क झाले आहेत. विशेष म्हणजे नांदेड आणि पंजाबमध्ये कुख्यात असलेला दहशतवादी रिंधा (Rindha) याच्यासाठी हे दहशतवादी काम करत असल्याचं उघड झाल्यामुळे नांदेड पोलिसांची (Nanded Police) झोप उडाली आहे. हे दहशतवादी नांदेडच्या दिशेने शस्त्रसाठा घेऊन येणार होते. त्यामुळे नांदेडसह महाराष्ट्रात काही घातपात घडवण्याचा त्यांचा डाव होता का, याचा तपास पोलीस करत आहेत. नांदेड जिल्हा पोलीस दलाचे निसार तांबोळी, पोलीस उप महानिरीक्षक, नांदेड व जिल्हा पोलीस प्रमुख प्रमोदकुमार शेवाळे यांनी परिस्थितीचे गांभीर्य ओळखून सर्व अधिकाऱ्यांना सूचना दिल्या आहेत. कुख्यात गुन्हेदार हरविंदरसिंग ऊर्फ रिंधा संधू याचं नांदेडमधील टोळीतील सर्व सदस्यांची व अभिलेखावरील गुन्हेगारांच्या घरांची झाडा-झडती घेण्याचं सत्र पोलिसांनी सुरु केलं आहे.
नांदेड पोलीस अॅक्टिव्ह, गुन्हेगारांवर करडी नजर
हरियाणा राज्यातील कर्नाल जिल्ह्यात पकडण्यात आलेल्या चार दहशतवाद्यांकडून विस्फोटक पदार्थ आणि अनेक हत्यारं, दारु गोळा जप्त करण्यात आलाआहे. गुरमित, अमनदीप, परमींदर आणि भूमींदर अशी या चार दहशतवाद्यांची नावं असून रिंधा त्यांच्यामार्फत नांदेडमध्ये शस्त्रसाठा पाठवत होता, असे उघड झाले आहे. कर्नाल पोलिसांच्या समयसूचकतेमुळे रिंधाचा हा प्रयत्न फसला, मात्र याआधी नांदेडमध्ये शस्त्रसाठा पोहोचलेला असू शकतो, या संशयातून नांदेडमधील गुन्हेगारी पार्श्वभूमी असलेल्या आरोपींची झाडाझडती घेतली जात आहे.
नांदेड पोलिसांची पथकं कामाला
या धाडसत्र व घरांची झाडाझडती घेण्यासाठी शहरातील एसआयटी पथकातील पोलीस अधिकारी व अंमलदार, उपविभागीय पोलीस अधिकारी, स्थानिक गुन्हे शाखेची तीन पथकं अशा टीम कामाला लागल्या आहेत. हरियाणात पकडलेल्या दहशतवाद्यांचं नांदेड कनेक्शन काय आहे, हे तपासण्यासाठी मोठी मोहीम हाती घेण्यात आली आहे. रात्री आणि दिवसा अचानकपणे गुन्हेगारांच्या आणि रिंधा याच्या साथीदारांच्या घराची झडती घेतली जाऊन इतर तपास केला जात आहे.
