बीड संतोष देशमुख हत्याप्रकरणी मोठी अपडेट, वाल्मिक कराड महाराष्ट्रातच! CID लवकरच आवळणार मुसक्या
बीड हत्या प्रकरणाची चौकशी सीआयडीकडून केली जात आहे. तर दुसरीकडे या प्रकरणाची चौकशी बीड पोलीसही करत आहेत. त्यात आता वाल्मिक कराडबद्दल एक महत्त्वपूर्ण माहिती समोर आली आहे.
बीड जिल्ह्याच्या केज तालुक्यातील मस्साजोगमधील सरपंच संतोष देशमुख यांची निर्घृण हत्या करण्यात आली. या घटनेनंतर सध्या राजकीय वातावरण ढवळून निघाले आहे. या घटनेचा सर्वच स्तरावरुन निषेध केला जात आहे. संतोष देशमुख यांच्या हत्येचा मास्टरमाईंड वाल्मिक कराड असल्याचे बोलले जात आहे. वाल्मिक कराड हा मंत्री धनंजय मुंडे यांच्या जवळचा आहे, असा आरोप संतोष देशमुख यांचे कुटुंबीय आणि गावकऱ्यांकडून केला जात आहे. सध्या बीड हत्या प्रकरणाची चौकशी सीआयडीकडून केली जात आहे. तर दुसरीकडे या प्रकरणाची चौकशी बीड पोलीसही करत आहेत. त्यात आता वाल्मिक कराडबद्दल एक महत्त्वपूर्ण माहिती समोर आली आहे.
संतोष देशमुख हत्याप्रकरणाचा मास्टरमाईंड असलेला वाल्मिक कराड हा महाराष्ट्रातच असल्याची माहिती सूत्रांनी दिली आहे. वाल्मिक कराड हा महाराष्ट्राच असून सीआयडीचे विशेष पथक त्याच्या शोधासाठी रवाना झाले आहे. आजपासून सीआयडीच्या आणखी ४ टीम वाल्मिक कराडचा शोध घेणार आहेत. त्यामुळे वाल्मिक कराडच्या मुसक्या लवकरच आवळल्या जाण्याची शक्यता वर्तवली जात आहे.
वाल्मिक कराडची १०० हून अधिक बँक खाती गोठवली
तर दुसरीकडे संतोष देशमुख हत्या प्रकरणी सीआयडीकडून जप्ती सुरु झाली आहे. सीआयडीकडून या प्रकरण खंडणी, हत्या, अॅट्रोसिटी प्रकरणातील फरार आरोपींची बँक खाती गोठवण्यात आली आहेत. यात वाल्मिक कराडची १०० हून अधिक बँक खाती गोठवली गेली आहे. त्यासोबतच वाल्मिक कराडची आणखी कोणत्या बँकेत खाती आहेत, याचाही शोध सुरु आहे. या जप्ती संदर्भातील पत्र सीआयडीकडून उच्च न्यायालयात देण्यात आले आहे.
पत्नीची सीआयडीकडून चौकशी
तसेच बीडमधील संतोष देशमुख हत्या प्रकरणाच्या तपासासाठी गुन्हे अन्वेषण विभागाने (सीआयडी) 9 पथके तयार केली आहेत. यात १५० पेक्षा जास्त अधिकारी आणि कर्मचाऱ्यांचा समावेश आहे. संतोष देशमुख यांच्या हत्यानंतर वाल्मिक कराड यांच्यावर खंडणीचा गुन्हा दाखल करण्यात आला आहे. त्यातच मुख्यमंत्री देवेंद्र फडणवीस यांच्या आदेशानुसार, वाल्मिक कराडचे बँक खाते गोठवण्यात आले आहेत. वाल्मिक कराड नव्हे तर त्याच्या नातेवाईकांची बँक खाती गोठवण्यात आली आहेत. वाल्मिक कराडच्या पत्नीची सीआयडीकडून चौकशी करण्यात आली. तब्बल दोन तास ही चौकशी सुरु होती.
वाल्मिक कराड कोण?
- संतोष देशमुख हत्या प्रकरणाचा मास्टरमाईंड असल्याचा आरोप
- मंत्री धनंजय मुंडेंचे निकटवर्तीय
- गेल्या दहा वर्षांपासून राष्ट्रवादी पक्षाचे काम
- धनंजय मुंडे यांच्या अनुपस्थितीमध्ये परळीमधील नागरिकांच्या समस्या सोडवण्यात अग्रेसर
- परळीचे नगराध्यक्ष म्हणून काम केले.
- 307 सारख्या गुन्हांमध्ये सहभागी असल्याचा आरोप
