लंडनला पळून गेलेला निरव मोदी कर्जतमध्ये? मंत्री म्हणतात, तो तोच असेल तर…
कर्जत येथे होणाऱ्या एमआयडीसीच्या जागेची भूनिवड समितीने पाहणी केली आहे. पंरतु, इथे पाणीपुरवठा करण्याबाबत जलसंपदा विभागाने निर्णय घेतलेला नाही. अन्य काही बाबींचीही पूर्तता करायची असून येत्या तीन महिन्यांत याबाबत निर्णय घेण्यात येईल, असे त्यांनी सांगितले.
मुंबई । 27 जुलै 2023 : विधानसभेचे कर्जत जामखेडचे आमदार रोहित पवार आणि भाजपचे माजी मंत्री, विधान परिषदेतील आमदार राम शिंदे यांच्यातले सख्खे वैर महाराष्ट्राला काही नवीन नाही. कोणत्या ना कोणत्या कारणावरून या दोघांमध्ये वार पलटवार सुरूच असतात. विधानसभेचे आमदार रोहित पवार कर्जत-जामखेडमध्ये एमआयडीसी सुरू होण्यासाठी प्रयत्न करत आहेत. त्याला सरकारनेही प्रतिसाद दिला. मात्र, त्यावरून आमदार राम शिंदे यांची विधान परिषदेत प्रश्न विचारून रोहित पवार यांची कोंडी केली. तर, उद्योग मंत्री यांनी चौकशीचे आदेश देत रोहित पवार यांच्या अडचणीत वाढ केली.
विधान परिषदेत आमदार राम शिंदे यांनी लक्षवेधी सूचना उपस्थित केली. अहमदनगर जिल्ह्यातील जामखेड एमआयडीसीचा मुद्दा त्यांनी लक्षवेधीद्वारे विचारला. सत्यजित तांबे, सचिन अहीर, शशिकांत शिंदे या चर्चेत सहभागी झाले होते. कर्जत तालुक्यात गुंतवणूकदारांनी शेतकऱ्यांच्या जमिनी कवडीमोल दरात विकत घेतल्या. नीरव मोदी, मनिषा कासोले, नयन गणेश अग्रवाल, कमलेश शाह, पंकज विनोद खन्ना, गणेश अग्रवाल अशी नावे वाचून दाखवत लंडनमध्ये पळून गेलेला निरव मोदी याचे नाव यात असल्याचे सांगितले.
एमआयडीसी ही गुंतवणूकदार यांच्यासाठी करायची आहे की शेतकरी, बेरोजगार यांच्यासाठी करायची असा सवाल त्यांनी उपस्थित केला. राष्ट्रवादीचे आमदार रोहित पवार कर्जत-जामखेडमध्ये एमआयडीसी सुरू होण्यासाठी प्रयत्न करत आहेत. पंरतु, एमआयडीसीला मिळणारी जमीन नीरव मोदी यांची असल्याचा थेट आरोप आमदार राम शिंदे केला.
आमदार राम शिंदे यांच्या या आरोपामुळे एकच खळबळ उडाली. त्याला उत्तर देताना उद्योग मंत्री उदय सामंत म्हणाले, कर्जतला एमआयडीसी करण्याबाबत शासन सकारात्मक आहे. पण, आता तुमच्या आरोपामुळे नीरव मोदी याने येथे जमीन घेतल्याचे समोर आले. मात्र, येथे जमीन घेतलेला हा नीरव मोदी लंडनला पळून गेलेला फरार नीरव मोदी आहे की स्थानिक आहे याची माहिती घेतली जाईल. तसेच, सर्व नावांची सखोल चौकशी करण्यात येईल, असे स्पष्ट केले.
