जामोदवरुन बुऱ्हाणपूरला जात होते, चालकाचे वाहनावरील नियंत्रण सुटले अन्…

बोलेरो गाडीच्या अपघातात महिला ठार

Image Credit source: TV9

गणेश सोळंकी, TV9 मराठी, बुलढाणा : बुलढाणा जिल्ह्यातील जळगाव जामोद-बुऱ्हाणपूर मार्गावर शुक्रवारी सायंकाळी भीषण अपघाताची घटना घडली. भरधाव वेगातील बोलेरो गाडीवरील चालकाचे नियंत्रण सुटले आणि ती गाडी पलटी झाली. या अपघातात गाडीमधील ८५ वर्षीय वृद्ध प्रवासी महिलेचा जागीच मृत्यू झाला, तर इतर पाच प्रवासी गंभीर जखमी झाले आहेत. त्यांना तातडीने ग्रामीण रुग्णालयात हलवण्यात आले आहे. पोलिसांनी अपघातप्रकरणी गुन्हा दाखल करून अधिक तपास सुरु केला आहे. लावतीबाई श्रीराम टेकाळे असे मयत महिलेचे नाव आहे. या घटनेमुळे परिसरात काही काळ गोंधळाचे वातावरण होते.

पुलावरून खाली कोसळली बोलेरो

जळगाव जामोद-बुऱ्हाणपूर हा वर्दळीच्या मार्गांपैकी एक मार्ग आहे. या मार्गावरून भरधाव वेगाने गाड्या चालवल्या जातात. अशाच भरधाव बोलेरो गाडीला निमखिडी फाट्याजवळ अपघात झाला. चालकाचे गाडीवरील नियंत्रण सुटले. त्यामुळे भरधाव बोलेरो पीकअप गाडी पुलावरून खाली पलटी झाली. त्यात आतील प्रवासी त्याखाली अडकले गेले. अपघातात 85 वर्षीय लावतीबाई श्रीराम टेकाळे या वृद्ध महिलेला गंभीर दुखापत झाली. या महिलेचा जागीच मृत्यू झाला. ही वृद्ध महिला खामगाव तालुक्यातील पद्मापूर गावची रहिवाशी असून, पोलिसांनी घटनास्थळी पंचनामा केल्यानंतर महिलेचा मृतदेह कुटुंबियांच्या ताब्यात दिला.

नांदेड-हिंगोली महामार्गावर एसटीला ऑटोची धडक

नांदेड-हिंगोली महामार्गावर एका ऑटोने एसटीला जोराची धडक दिल्याने ऑटोमधील पाच प्रवासी जखमी झाले आहेत. बाळापुरकडून एसटी महामंडळाची बस कळमनुरीकडे जात असताना घटना घडली. पोलिसांनी तात्काळ घटनास्थळी धाव घेऊन जखमींना रुग्णालयात दाखल केले. जखमींवर कळमनुरी येथील उपजिल्हा रुग्णालयात उपचार सुरू आहेत. तर गंभीर जखमींना हिंगोली येथील जिल्हा सामान्य रुग्णालयात हलवण्यात आले आहे.