मनपा निवडणुकीत किती सदस्यीय प्रभागरचना? उमेदवारांसह प्रशासनही पडले गोंधळात
नाशिक महानगर पालिकेत यापूर्वी दोन, चार आणि नंतर तीन सदस्यीय प्रभाग रचना करण्यात आली आहे. महाविकास आघाडी सरकारने बदललेली प्रभाग रचना शिंदे सरकारने रद्द केली होती.
नाशिक : राज्यात सत्तांतर झाल्यानंतर आता नाशिक महानगर पालिकेच्या आयुक्तांना नगर विकास मंत्रालयाने प्रभाग रचनेबाबत पत्र दिले आहे. त्यामुळे प्रभाग रचना आणि आरक्षणाची सोडत झाल्यानंतर निवडणुका जाहीर होण्याची दाट शक्यता वर्तवली जात आहे. नाशिक महानगर पालिकेच्या प्रभाग रचेनत 122 नगरसेवक आहेत. त्याची संख्या महाविकास आघाडीने 133 वर नेली होती. खरंतर फडणवीस सरकार आल्यानंतर चार सदस्यीय प्रभाग रचना करण्यात आली होती, त्यानुसार निवडणुकाही पार पडल्या होत्या. त्यामध्ये राज्यात महाविकास आघाडी सरकार आल्यानंतर तीन सदस्यीय प्रभाग रचना करण्यात आली होती. त्यानंतर मात्र कोरोनाचा प्रादुर्भाव असल्याने निवडणुका लांबणीवर पडल्या होत्या. निवडणुका जाहीर होण्याची परिस्थिती असतांनाच राज्यात सत्तांतर झाले. आणि पुन्हा एकदा निवडणुका लांबणीवर पडल्या होत्या. त्यात आता नगर रचना विभागाने नाशिकमध्ये पुन्हा एकदा प्रभाग रचना करण्याच्या आणि आरक्षणाबाबत निर्णय घेण्याचे आदेश दिल्याने निवडणुकीचे बिगूल लवकरच वाजणार अशी चर्चा पुन्हा एकदा सुरू झाली आहे.
नाशिक महानगर पालिकेत यापूर्वी दोन, चार आणि नंतर तीन सदस्यीय प्रभाग रचना करण्यात आली आहे. महाविकास आघाडी सरकारने बदललेली प्रभाग रचना शिंदे सरकारने रद्द केली होती.
2014 मध्ये फडणवीस सरकार आल्यानंतर चार सदस्यीय प्रभाग रचना करण्यात आली होती, त्याचा फायदा भाजपाला अनेक ठिकाणी झाल्याचे पाहायला मिळत आहे.
त्यानुसार आता पुन्हा एकदा तीन सदस्यीय प्रभाग रचनेचा निर्णय रद्द करून चारचा प्रभाग केला जाणार असून त्यानुसार येत्या काळात लवकरच निवडणुका जाहीर होण्याची शक्यता वर्तवली जात आहे.
नाशिक महानगर पालिकेच्या आयुक्तांना याबाबत पत्र देण्यात आले असून प्रशासनाकडून अंमलबजावणीला सुरुवात झाली आहे.
नगर रचना विभागाने पत्र पाठविल्याने भाजप आणि शिंदे गटात आनंदाचे वातावरण निर्माण झाले आहे, मात्र दुसरींकडे महाविकास आघाडीला हा मोठा धक्का मानला जात आहे.
वारंवार प्रभाग रचेनत आणि आरक्षणात बदल करावा लागत असल्याने प्रशासनाची दमछाक होत आहे. येत्या काळात निवडणूक जाहीर होण्याची शक्यता वर्तवली जात असल्याने राजकीय वर्तुळात जोरदार चर्चा सुरू झाली आहे.
