कंटेनर-टिप्परची झाली समोरासमोर धडक ; कारण नसताना दुचाकीस्वार मध्येच अडकले आणि…

गडचिरोली : ऐन उन्हाळ्याच्या दिवसातच लांब असलेल्या कंटेनर व टिप्परची समोरासमोर धडक होऊन घाटात  अपघात झाला आहे. याचवेळी दोन दुचाकीस्वार या वाहनांच्यामध्ये अडकले होते. या विचित्र अपघातात दोन ठार झाले तर एक गंभीर जखमी झाला आहे. 5 एप्रिल रोजी दुपारी सव्वा दोन वाजता कुरखेडा तालुक्यातील डोंगरगाव पाटीजवळ ही घटना घडली आहे. कोरची-कुरखेडा मार्गावर कंटेनर व टिप्परची मोठी रहदारी असते. 5 रोजी दुपारी कंटेनर (सीजी 04- एनटी- 1113) छत्तीसगडहून महाराष्ट्रात येत होता, तर टिप्पर (एमएच 14 एचयू – 1862) छत्तीसगडकडे जात होते. डोंगरगावजवळ पाटीजवळील घाटात या दोन्ही वाहनांचा समोरासमोर अपघात झाला.

ही धडक एवढी जबरदस्त होती की टिप्पर रस्त्याच्या मधोमध उलटला तर कंटेनरच्या समोरील भागाचे मोठे नुकसान झाले आहे.

दरम्यान, याचवेळी त्या ठिकाणाहून दुचाकी (एमएच 33 डी- 9116) व अन्य एक दुचाकी जात होत्या. त्याचवेळी कंटेनर आणि टिप्परची समोरासमोर धडक झाली आणि त्यामध्ये दुचाकीसवरील दोघांचा जागीच मृत्यू झाला तर एकजण गंभीर जखमी झाला आहे. तिघांनाही कुरखेडा ग्रामीण रुग्णालयात हलविण्यात दाखल करण्यात आले होते.

या अपघातातील दोन मृतांसह एक जखमी असे तिघेही मालेवाडा (ता. कुरखेडा) येथील रहिवासी असून त्यांची ओळख पटविण्याचे काम सुरु होते. पुराडा पोलिसांनी घटनास्थळी धाव घेतली असून पुढील तपास सुरू केला आहे.

या मार्गावर अपघातग्रस्त वाहनांच्यामुळे रस्त्यात वाहनांच्या लांबच लांब रांगा लागल्या होत्या. लांबलचक कंटेनर व टिप्पर ऐन रस्त्यात अडकल्याने रहदारीला अडथळा निर्माण झाला होता. अपघातग्रस्त वाहने हटवून वाहतूक सुरळीत करण्यासाठी भरउन्हात पुराडा पोलीस प्रयत्न करत आहेत.