झारखंड सरकारचा एक निर्णय, जैन समाज बांधव एकवटले, महाराष्ट्रात ठिक-ठिकाणी निषेध आंदोलनं
पुण्यात आज जैन समाजाच्या व्यापाऱ्यांनी दुकानं बंद ठेऊन निर्णयाचा निषेध केला. व्यापारी महासंघातील जैन व्यापारी भारत बंदमध्ये सहभागी झालेत.
मुंबईः झारखंड (Jharkhand) राज्यातील जैन धर्मियांचे धर्मस्थळ असलेल्या सम्मेद शिखरास झारखंड सरकारने नुकतेच पर्यटन स्थळ (Tourism place) म्हणून घोषित केले. पर्यटन स्थळ जाहीर केल्याने सम्मेद शिखराचे पावित्र्य धोक्यात येईल, असा इशारा जैन सामाजाच्या (Jain Community) वतीने देण्यात आला आहे. काल झालेल्या या निर्णयांनंतर झारखंड, महाराष्ट्र, मध्यप्रदेशातील जैन समाजबांधव या निर्णयाविरोधात एकवटले आहेत. महाराष्ट्रात आज जैन समाजाने बंदची हाक दिली होती.
नाशिक, सांगली, सोलापूर, जळगाव आदी ठिकाणी जैन बांधवांनी निषेध मोर्चा काढला. तसेच विविध ठिकाणी प्रमुख बाजारपेठा बंद ठेवत आंदोलनाला प्रतिसाद देण्यात आला.
जळगावात माजी मंत्री सुरेश जैन यांच्या नेतृत्वात…
जळगावमध्ये जैन समाजाच्या वतीने काळया फिती लावून निषेध व्यक्त करण्यात आला. जिल्हाधिकाऱ्यांच्या मार्फत राष्ट्रपतींना निवेदन देऊन सम्मेद शिखर पर्यटन स्थळ न करता धर्मस्थळ करण्याची मागणी करण्यात आली. याप्रसंगी माजी मंत्री सुरेश जैन हे देखील जैन समाज बांधवांसोबत सहभागी होऊन सुरेश जैन यांनी जिल्हाधिकाऱ्यांना निवेदन दिले.
संसदेत मुद्दा मांडला
शिंदे गटाचे खासदार श्नीरंग बारणे यांनी जैन समाजाचा मुद्दा संसदेत मांडला. समाजाच्या भावनांचा आदर करून तीर्थक्षेत्र पर्यटन स्थळ म्हणून जाहीर करू नका, अशी विनंती केली.
पुण्यातही दुकाने बंद
पुण्यात आज जैन समाजाच्या व्यापाऱ्यांनी दुकानं बंद ठेऊन निर्णयाचा निषेध केला. व्यापारी महासंघातील जैन व्यापारी या भारत बंदमध्ये सहभागी झालेत.
धुळ्यातही निषेध
धुळे शहराचा संपूर्ण जिल्हाभरातील जैन धर्म समाज बांधवांनी एकत्र येत काळ्याफिती लावून झारखंड सरकारच्या निर्णयाचा निषेध केला.
सोलापुरात घोषणाबाजी
सोलापूरच्या माढ्यात जैन बांधवानी भव्य असा शहरातून मूक मोर्चा काढला. या मोर्चात बहुजन समाज बाधवांनी पाठिंबा दर्शवला. लहान मुलासह महिलांनी जय जिनेंद्रचा जयघोष करीत झारखंड सरकारच्या निषेधाच्या घोषणा दिल्या.
