ती काळरात्र कशी होती, संग्राम जगताप यांनी सेकंद ना सेकंद सांगितला, अपघाताचा तो थरारक क्षण
अंधारात एसटी चालकाला हे बॅरिकेटिंग लक्षात येण्यास उशीर झाल्यामुळे त्याने अचानक बस उजव्या लेनमध्ये वळवली. त्यामुळे आमदार जगताप यांच्या बीएमडब्ल्यू कारला बसची जोरदार धडक बसली.
अहमदनगर : अहमदनगर शहरातील राष्ट्रवादी काँग्रेसचे आमदार संग्राम जगताप (Sangram Jagtap) यांच्या कारला मंगळवारी पहाटेच्या सुमारास भीषण अपघात झाला. या अपघातात त्यांच्या अलिशान कारचा अक्षरशः चेंदामेंदा (Car Accident) झाला, मात्र सुदैवाने गाडीतील सर्व एअरबॅग्ज वेळीच उघडल्यामुळे आमदार जगताप यांच्यासह गाडीतून प्रवास करणाऱ्या पाचही जणांचा जीव थोडक्यात बचावला. ती काळरात्र कशी होती, याची सेकंद न सेकंद माहिती संग्राम जगताप यांनी सांगितली. मुंबई-पुणे एक्सप्रेस वेवर (Mumbai Pune Express Way) प्रवास करताना एसटी चालकाने अचानक गाडी उजवीकडे घेतल्यामुळे बसची धडक जगतापांच्या कारला बसली होती.
नेमकं काय घडलं?
आमदार संग्राम जगताप आज पहाटेच्या सुमारास मंत्रालयातील कामासाठी नगरहून मुंबईला निघाले होते. मुंबई-पुणे एक्सप्रेस वेवर रसायनी गावाजवळ रस्ता दुरुस्तीच्या कामासाठी वाहतूक वळवण्यात आली आहे. त्यासाठी बॅरिकेट लावण्यात आले आहेत. पहाटे चार वाजता एक एसटी बस निघाली होती. मात्र अंधारात एसटी चालकाला हे बॅरिकेटिंग लक्षात येण्यास उशीर झाल्यामुळे त्याने अचानक बस उजव्या लेनमध्ये वळवली. त्यामुळे आमदार जगताप यांच्या बीएमडब्ल्यू कारला बसची जोरदार धडक बसली.
एअर बॅग्जमुळे पाचही जण बचावले
बसची धडक इतकी जबरदस्त होती की, आमदार जगताप यांच्या आलिशान कारच्या पुढील भागाचा अक्षरशः चेंदामेंदा झाला. मात्र अपघात होताच वाहनातील एअर बॅग उघडल्याने कोणालाही गंभीर दुखापत झाली नाही. अपघाताच्या वेळी वाहनात आमदार संग्राम जगताप, अनुप काळे, चालक आणि मुंबईतील दोन स्वीय सहाय्यक असे पाच जण होते
ही घटना घडताच आमदार जगताप यांनी कुटुंबाला फोन करुन अपघाताची माहिती दिली आणि काळजी न करण्यास सांगितलं. जगताप यांनी समर्थकांनाही चिंता न करण्याचं आवाहन केलं आहे. त्यानंतर संग्राम जगताप सुखरुप मुंबईलाही पोहोचले.
