Maharashtra Election News LIVE : काँग्रेस आणि ठाकरे गटात कोणताही वाद नाही – संजय राऊत

अनिल पाटील आज दाखल करणार उमेदवारी अर्ज

राष्ट्रवादी काँग्रेस अजित पवार गटाचे मंत्री अनिल पाटील यांचं कुटुंबियांच्या वतीने औक्षण करण्यात आहे. ते उमेदवारी अर्ज दाखल करण्यासाठी रवाना झाले आहेत. अमळनेर विधानसभा मतदारसंघातून मंत्री अनिल पाटील यांना उमेदवारी जाहीर झाली आहे. ते लवकरच उमेदवारी अर्ज दाखल करण्यासाठी जाणार आहेत. मंत्री अनिल पाटील यांची आई त्यांची पत्नी आणि इतर कुटुंबियांच्या वतीने त्यांचे औक्षण करण्यात आलं. आईसह ज्येष्ठ व्यक्तींचा तसेच पूर्वजांचा आशीर्वाद घेऊन मंत्री अनिल पाटील हे उमेदवारी अर्ज दाखल करण्यासाठी रवाना झाले आहेत. अमळनेर शहरात भव्य रॅली काढली जाणार आहे. हजारोंच्या संख्येने कार्यकर्त्यांच्या उपस्थितीत मोठं शक्ती प्रदर्शनही केले जाणार आहे.

काँग्रेस आणि ठाकरे गटात कोणताही वाद नाही – संजय राऊत

काँग्रेस आणि ठाकरे गटात कोणताही वाद नाही. महाविकासआघाडी २८८ जागा लढणार आहे. पण शेवटच्या क्षणी काही जागांवर अदलाबदल होऊ शकते – संजय राऊत

महायुतीचे उमेदवार सुनील शेळके आज उमेदवारी अर्ज दाखल करणार

मावळ विधानसभा मतदारसंघातून महायुतीचे उमेदवार सुनील शेळके आज उमेदवारी अर्ज दाखल करणार आहेत. आज तुकोबांचं दर्शन घेऊन आज उमेदवारी अर्ज भरणार आहे. भाजप नेते वेठीस धरत आहेत. ही चुकीची पद्धत आहे. उपमुख्यमंत्री देवेंद्र फडणवीस तोडगा काढतील, असेही सुनील शेळकेंनी म्हटले.

धनंजय मुंडे आज उमेदवारी अर्ज दाखल

परळी विधानसभा मतदारसंघासाठी धनंजय मुंडे आज उमेदवारी अर्ज दाखल करणार आहेत. नाथरा या मूळ गावातून धनंजय मुंडे यांनी दौऱ्याला सुरुवात केली. आई रुक्मिणी व स्वर्गीय पंडित अण्णा मुंडे यांच्या समाधी भवनावर नतमस्तक झाले आहेत. लोकनेते गोपीनाथ मुंडे यांच्या गोपीनाथ गडावर जाऊन धनंजय मुंडे हे समाधीचे दर्शन घेणार आहेत. त्यासोबतच धनंजय मुंडे परळीतील पंडिता अण्णा यांच्या समाधी स्थळाकडे रवाना झाले आहेत.

गोपीनाथ मुंडे यांच्या समाधीवर धनंजय मुंडे नतमस्तक

धनंजय मुंडे यांचं गोपीनाथ गडावर आगमन झालं. लोकनेते गोपीनाथ मुंडे यांच्या समाधीवर धनंजय मुंडे नतमस्तक झाले आहेत. परळी विधानसभा मतदारसंघासाठी धनंजय मुंडे आज अर्ज दाखल करणार आहेत. काहीच वेळात अर्ज दाखल करण्यासाठी परळीकडे रवाना होतील.

जळगावमध्ये दीड कोटींची रोकड सापडली

जळगावच्या एरंडोल तालुक्यातील कासोदा गावात पोलिसांच्या पथकाला नाकाबंदी दरम्यान पकडली दीड कोटींची रोकड सापडली आहे.  एरंडोल-पारोळा मतदार संघातील कासोदा गावात पोलिसांच्या पथकाने नाकाबंदी दरम्यान मंगळवारी रात्री कारमधून दीड कोटीची रोकड जप्त केल्यामुळे एकच खळबळ उडाली आहे. दरम्यान रात्री उशिरापर्यंत ही रोकड नेमकी कोणाची आणि कशासाठी आणली होती?,याचा खुलासा होऊ शकला नव्हता. परंतु या कारमधील रोकड एका बड्या राजकीय नेत्याशी संबंधित असल्याचीही जोरदार चर्चा आहे.

दक्षिण सोलापूरची जागा दिलीप मानेंना जागा सुटण्याची आशा

दक्षिण सोलापूरची जागा शिवसेना ठाकरे गटाला गेल्यानंतरही काँग्रेसच्या दिलीप मानेंना जागा सुटण्याची आशा आहे. फेसबुक पोस्ट करत माजी आमदार दिलीप माने यांनी आशा व्यक्त केली आहे. महाविकास आघाडीत सोलापूर दक्षिणची जागा ठाकरे गटाच्या अमर पाटील यांना जाहीर झाली आहे. काल उद्धव ठाकरेंनी अमर पाटील यांना बी फॉर्म देत उमेदवारी जाहीर केलीय. माझा काँग्रेस पक्ष, त्याचे नेतृत्व आणि काँग्रेसच्या विचारधारेवर संपूर्ण विश्वास आहे. आपल्या काँग्रेसचा पारंपरिक सोलापूर दक्षिण विधानसभा मतदारसंघ काँग्रेसलाच मिळणार आहे आणि तो आपणच लढणार आहोत..!, अशी पोस्ट दिलीप माने यांनी शेअर केलीय.

मनोज जरांगेंच्या भेटासाठी इच्छुकांची गर्दी

आज मनोज जरांगे पाटलांचा उपस्थित राज्यातील इच्छुक उमेदवारांची बैठक होत आहे. इच्छुकांशी मनोज जरांगे पाटील संवाद साधणार  आहेत. अनेक इच्छुकातून एक उमेदवार निवडण्याची प्रक्रिया जरांगे पाटील आज पूर्ण करणार आहे. अंतरवाली सराटी येथे सकाळपासूनच इच्छुकांची मोठी गर्दी व्हायला सुरुवात झाली आहे.

पिंपरी चिंचवड – पाण्याची टाकी कोसळून 3 ते 4 कामगारांचा मृत्यू

पिंपरी चिंचवड येथे भोसरी सद्गुरूनगर येथे पाण्याची टाकी कोसळून 3 ते 4 बिगारी कामगारांचा मृत्यू झाला आहे. अँब्युलन्स तसेच अग्निशमन दलाचे जवान, बचाव पथकाचे अधिकारी घटनास्थळी दाखल झाले असून बचाव कार्य सुरू आहे.

आज महायुतीचे अनेक उमेदवार करणार उमेदवारी अर्ज दाखल

आज महायुतीचे अनेक उमेदवार उमेदवारी अर्ज दाखल करणार आहेत.

शिर्डी विधानसभेसाठी भाजपकडून महसुलमंत्री राधाकृष्ण विखे पाटील तर अकोलेतुन राष्ट्रवादी अजीत पवार गटाचे विद्यमान आमदार डॉ.किरण लहामटे हे आणि राहुरी विधानसभा मतदारसंघातून भाजपचे शिवाजी कर्डीले अर्ज दाखल करणार आहेत.

रत्नागिरी – शिवसेना शिंदे गटाचे राजापूर विधानसभा मतदारसंघातील उमेदवार किरण सामंत आज दाखल करणार उमेदवार

रत्नागिरी- राजापूर विधानसभा मतदारसंघातील शिवसेनेचे उमेदवार किरण सामंत आज  उमेदवारी अर्ज दाखल करणार आहेत. त्यापूर्वी त्यांनी पत्नीसह ग्रामदेवतेचे दर्शन घेतले. किरण सामंत यांनी व्यक्त केला विजयाचा विश्वास.

माढ्यात आमदार बबनराव शिंदेचे पुत्र रणजितसिंह शिंदे आज उमेदवारी दाखल करणार अर्ज

विधानसभेच्या निवडणुकीसाठी अर्ज दाखल करण्याच्या आजच्या तिसऱ्या दिवशी माढा येथे आमदार बबनराव शिंदेचे पुत्र जिल्हा दूध संघाचे चेअरमन रणजितसिंह शिंदे आज अपक्ष उमेदवारी अर्ज दाखल करणार आहेत.

राज्यात मविआ आणि महायुतीच्या जागा वाटपाचा तिढा सुटता सुटेना

राज्यात मविआ आणि महायुती च्या जागा वाटपाचा तिढा अद्याप सुटलेला नाही.  महाविकास आघाडीत शिवसेना ठाकरे पक्ष , काँग्रेस, राष्ट्रवादी , शरद पवार पक्ष यांना प्रत्येकी 85 जागांचे वाटप निश्चित करण्यात आल्याची माहिती तर उर्वरित 33जागांसाठी पुन्हा चर्चा करण्यात येणार आहे. शिवसेनेच्या आक्रमक भूमिकेमुळे काँग्रेसमधून तीव्र नाराजी आहे.

तर दुसरीकडे महायुतीच्या जागावाटपाचा तिढाही सुटला नसून 25-30 जागांच्या वाटपाबाबत भाजप पक्षश्रेष्ठींकडून निर्णय घेण्यात येणार आहे. आज दुपारनंतर महायुतीच्या जागा वाटपाचा तिढा सुटण्याची शक्यता वर्तवण्यात येत आहे.

मुख्यमंत्री एकनाथ शिंदे दिल्लीला जाणार, जागा वाटपाबाबत आज राजधानीत होणार अंतिम शिक्कामोर्तब

राज्याचे मुख्यमंत्री एकनाथ शिंदे आज सकाळी 9 च्या सुमारास दिल्लीला जाणार आहेत. राजधानीत ते अमित शाह यांची भेट घेणार असून

आज दिल्लीत जागा वाटपाबाबत अंतिम शिक्कामोर्तब होणार आहे. मुख्यमंत्री एकनाथ शिंदे हे कालच दिल्लीला जाणार होते मात्र त्यांंचा दौरा अचानक रद्द झाला होता. आज सकाळी ते पुन्हा दिल्लीला प्रस्थान करतील.