Akshay Shinde Encounter Hearing IMP : बदलापूर अत्याचार प्रकरणामधील आरोपी अक्षय शिंदेचा पोलिसांकडून एन्काऊंटर झाला. आरोपी अक्षय शिंदेने पोलिसांची रिव्हॉल्वर हातात घेऊन पोलिसांवरच गोळीबार केला. यानंतर पोलिसांनी स्व:संरक्षणासाठी केलेल्या गोळीबारात आरोपी अक्षयचा मृत्यू झाला. त्याला रुग्णालयात दाखल करण्यात केले असता त्याला मृत घोषित करण्यात आले. या घटनेनंतर अक्षय शिंदेंच्या आई-वडिलांनी आरोप करत मुंबई उच्च न्यायलयात याचिका दाखल केली. या याचिकेवर आज मुंबई हायकोर्टात तातडीने सुनावणी पार पडली. या सुनावणीवेळी हायकोर्टाने सरकारसह पोलिसांना चांगलेच खडसावले.
अक्षयला खोट्या आरोपात गोवण्यात आले असून त्याचा राजकीय बळी देण्यात आला आहे, असा आरोपही त्याच्या वडिलांनी दाखल केलेल्या याचिकेत करण्यात आला होता. याप्रकरणी रिट पिटीशन / ४१०७/२०२४ अंतर्गत हायकोर्टात तातडीची सुनावणी पार पडली. वकील अमित कटाकनवरे यांनी आरोपी अक्षय शिंदे यांच्या कुटुंबाची बाजू मांडली. तर सरकारी वकील हितेन वेणूगावकर यांनी कोर्टात सरकारची बाजू मांडली. न्यायमूर्ती रेवती मोहीती डेरे आणि चव्हाण यांच्या खंडपीठासमोर याबद्दलची सुनावणी पडली. यावेळी कोर्टाने प्रथमदर्शनी हा काही एन्काऊंटर वाटत नाही. पोलिसांवर संशय नाही पण याची योग्य चौकशी व्हायला हवी, असे न्यायमूर्तींनी म्हटले.
दरम्यान याप्रकरणाचा तपास राज्य सीआयडीकडे देण्यात आला आहे. त्यांची स्वतंत्र चौकशी सुरू आहे. यावर कोर्टाने सीआयडीचा तपास कधी पूर्ण होणार याची माहिती द्या, असे निर्देश राज्य सरकारला दिले आहेत. तसेच सीसीटीव्ही, सखोल पंचनामा कॉपी, सीडीआर, सीलबंद फॉरेन्सिक अहवाल या सगळ्यांचे जबाब द्या, असेही आदेश कोर्टाने दिले आहेत. याप्रकरणाची पुढील सुनावणी 3 ऑक्टोबर रोजी होणार आहे.