VIDEO: दबाव झुगारून बेकायदा बांधकामे पाडा, मी तुमच्या पाठीशी आहे; मुख्यमंत्र्यांच्या पालिकेला कडक सूचना
मुख्यमंत्री उद्धव ठाकरे यांनी मुंबई महापालिकेला मुंबईतील अनधिकृत बांधकामे युद्ध पातळीवर पाडण्याचे आदेश दिले आहेत. कोणत्याही दबावाला बळी पडू नका. (CM Uddhav Thackeray directs BMC to take action against unauthorized constructions)
मुंबई: मुख्यमंत्री उद्धव ठाकरे यांनी मुंबई महापालिकेला मुंबईतील अनधिकृत बांधकामे युद्ध पातळीवर पाडण्याचे आदेश दिले आहेत. कोणत्याही दबावाला बळी पडू नका. कोणताही दबाव सहन करू नका. दबाव झुगारून ही कारवाई करा. मी तुमच्या पाठीशी आहे, असं मुख्यमंत्री उद्धव ठाकरे यांनी सांगितलं.
मुख्यमंत्री उद्धव ठाकरे यांनी आज मुंबई महानगरपालिकेच्या अधिकाऱ्यांची बैठक बोलावली होती. यावेळी त्यांनी या कडक सूचना दिल्या आहेत. आजच्या दूरदृश्य प्रणालीद्वारे आयोजित बैठकीस पालिका आयुक्त इक्बालसिंग चहल, सहायक आयुक्त, उपायुक्त, प्रभाग अधिकारी, पालिका रुग्णालयांचे वैद्यकीय अधिष्ठाता तसेच टास्क फोर्सचे सदस्य देखील उपस्थित होते.लपूर्व आणि पश्चिम महामार्गालगत देखील मोठ्या प्रमाणावर डेब्रिज टाकल्या जातात असे निदर्शनास आले आहे, याठिकाणी कॅमेरे लावून जे हे करीत असतील त्यांच्यावर तातडीने कारवाई करा. कोविडमध्ये आपण खूप चांगली कामगिरी केली आहे. आता रस्ते, पदपथ, स्वच्छता, नागरी सुविधांच्या बाबतीत पूर्णपणे लक्ष केंद्रित करून कालबद्ध रितीने ती कामे पूर्ण करा आणि मुंबई शहराचा देशात आदर्श निर्माण करा, अशा सूचनाही मुख्यमंत्र्यांनी दिल्या.
बोट लावण्याची संधी देऊ नका
मुंबईत अनधिकृत बांधकामे सहन केली जाणार नाहीत. प्रभाग अधिकाऱ्यांनी अतिशय जागरूकपणे आणि कर्तव्यकठोरपणे यावर तातडीने कारवाई करावी. कुणाचाही दबाव आला तरी सहन करू नका. आम्ही आपल्या पाठीशी आहोत. मुंबईतील रस्ते दुरुस्ती कामांची निविदा प्रक्रिया व्यवस्थितपणे आणि पारदर्शक पद्धतीने करा, कुणालाही बोट उचलण्याची संधी मिळाली नाही पाहिजे हे पाहा, असेही ते म्हणाले.
खड्डे बुजवण्याचे काम करा
आपल्याला शहर सुंदर आणि उच्च दर्जाच्या सुविधा असलेले करायचे आहे. त्यामुळे रस्ते, पदपथ, दुभाजक, रस्तयांच्या कडेचे कठडे, बागा-उद्याने सुंदर आणि व्यवस्थित असतील हे पाहण्याचे काम पूर्ण करा. रस्त्यांवरील खड्डे बुजवण्याचे काम प्राधान्याने पूर्ण झाले पाहिजे, त्यासाठी कालमर्यादा ठरवून द्या, अशा सूचनाही त्यांनी केल्या.
डेब्रिजचा कचरा हटवा
कोविड लढाईत मुंबई मॉडेलची प्रशंसा झाली. आपल्या प्रयत्नांमुळे ते शक्य झाले आहे, टीमवर्क म्हणून आपण स्वतः:ला सिद्ध केले आहे. पण एवढ्यावर न थांबता आता आपल्याला नागरी सुविधांवर लक्ष केंद्रित केले पाहिजे. ज्याप्रमाणे आपण दररोजच्या स्वच्छतेसाठी प्रभागनिहाय पथके नेमलेली असतात त्याप्रमाणे डेब्रिजसाठी देखील पथके नेमावीत. तसेच बांधकामाचा कचरा, दगड-विटा माती लगेचच्या लगेच कसा उचलता येईल हे पाहावे, अशा सूचनाही त्यांनी केल्या.
कोविडचा धोका टळला नाही
सणांमागून सण येत आहेत. दिवाळी येतेय. एकीकडे कोविडचा धोका अजूनही संपलेला नाही. युकेमध्ये कोविड संसर्गात परत वेगाने वाढ दिसते आहे. तिथे परत रुग्णालये रुग्णांनी भरत आहेत. मी तेथील काही डॉक्टर्सशी सुद्धा बोललो असून आपल्याला देखील काळजी घ्यावी लागेल. पावसाळा संपत असताना मलेरिया, डेंग्यू, चिकनगुनिया या साथीच्या आजारांनी देखील डोके वर काढले असून आपण अतिशय काळजीपूर्वक हे रोग पसरण्यापासून रोखले पाहिजेत. त्यागवृष्टीने सर्व प्रकारची जनजागृती देखील करा आणि डासांचा नायनाट प्रभावीपणे होईल, अस्वच्छता राहणार नाही हे पाहण्याच्या सूचना देखील मुख्यमंत्र्यांनी दिल्या.
संबंधित बातम्या:
सोमय्यांनी अजित पवारांशी संबंधित जरंडेश्वरचा घोटाळा ईडीसमोर मांडला; ईडी अधिकारी म्हणाले…
असं काय आहे की 13 दिवसानंतरही आर्यन खानला जामीन मिळत नाहीय? वाचा 5 कारणे
(CM Uddhav Thackeray directs BMC to take action against unauthorized constructions)