ईडीची मुंबईत सर्वात मोठी कारवाई, सीरम इन्स्टिट्यूटचे संचालक झवारे पुनावाला यांची मालमत्ता जप्त
ईडीने मुंबईत सर्वात मोठी कारवाई केली आहे. सीरम इन्स्टिट्यूटचे संचालक झवारे पुनावाला यांची मालमत्ता ईडीकडून जप्त करण्यात आली आहे. संबंधित कारवाई समोर आल्यानंतर अनेकांच्या भुवया उंचावल्या आहेत.
मुंबई : मुंबईतून खूप मोठी आणि महत्त्वाची बातमी समोर आली आहे. ईडीने सीरम इन्स्टिट्यूटचे संचालक झवारे पुनावाला यांना मोठा झटका दिला आहे. ईडीने झवारे पुनावाला यांच्याविरोधात कारवाई करत तब्बल 3 स्थावर मातमत्ता जप्त केल्या आहेत. झवारे पुनावाला हे सीरम इन्स्टिट्यूचे सर्वेसर्वा सायरस पुनावाला यांचे बंधू आहेत. ते कंपनीच्या डायरेक्टर टीमचे प्रमुख घटक असल्याची देखील माहिती मिळत आहे. त्यामुळे ईडीची ही कारवाई संपूर्ण पुनावाला कुटुंबाला धक्का देणारी आहे.
ईडीकडून अधिकृतपणे प्रेस रिलीज जारी करत याबाबत माहिती देण्यात आली आहे. पनामा पेपर्स प्रकरणात झवारे पुनावाला यांचे काही व्यवहार हे संशयास्पद आढळले होते. त्यामुळे फेमा कायद्यांतर्गत कारवाई करण्यात आली. या कारवाईत जवळपास 40 कोटींपेक्षा जास्त किंमतीची मालमत्ता जप्त करण्यात आली आहे.
41 कोटी 64 लाख रुपयांची मालमत्ता जप्त
ईडीकडून मुंबईतल्या वरळीतल्या सीजे हाऊस इमारतीतील मालमत्ता जप्त करण्यात आली आहे. ईडीकडून फेमा कायद्या अंतर्गत संबंधित मोठी कारवाई करण्यात आली आहे. पनामा पेपर्स प्रकरणात ही मोठी कारवाई करण्यात आली आहे. झवारे पुनावाला यांच्या 3 स्थावर मालमत्ता ईडीकडून जप्त करण्यात आल्या आहेत. जप्त केलेल्या मालमत्तेची किंमत तब्बल 41 कोटी 64 लाख इतकी आहे.
